Shillong, Ïaïong 02
Ka Jamshedpur FC kan pdiang ïa ka Mohun Bagan Super Giant (MBSG) sha ka jingïakhun semi final wat ba nyngkong jong ka Indian Super League (ISL) 2024-25 ka ban long ha ka Sngi Palei ha ka por 7:30 baje janmiet.
Kane kan dei ka sien kaba nyngkong ba kine arliang mamla kin ïakynduh ha ka semi final. Ka MBSG ka la ïoh ïa ka jingjop ha ka ISL League Shield, katba ka Jamshedpur ka la pynliem noh ïa ka NorthEast United FC da 2-0 ha ka playoff.
Kumba ka paw ka Jamshedpur FC kam shym la lah ban pynurlong ïa ka jingjop ha ki hynriew sien ïakhun ba la dep pyrshah ïa ka Mohun Bagan Super Giant ha ka ISL namar ka la shah rem ha ki saw sien ïakhun. Kawei pat ka jingbym lah ban ïoh ïa ka jingjop hangne kan pynlong ïa ka liang pyrshah ban mad ïa ka jingshah rem kaba nyngkong eh ha kane ka lympung.
Ha kawei pat ka liang ka MBSG kam shym la shah rem ha ka lynti ïaid ha ki hynriew tylli ki jingïalehkai ba la dep, da kaba jop lai sien bad thep 13 kol bad shah thep tang lai kol. Ka jingkiar na ka jingshah rem hangne kan ym pynlong ïa ka ban bat ïa ka rekod kaba thymmai jong ka klob na ka bynta ka jingïalehkai shabar ka ïing ha kane ka lympung.
