Shillong, Ïaïong 02
Ka Real Madrid ka la lah ban pynthikna ban jam sha ka final jong ka Copa del Rey hadien ba ka la lah ban pynïakhaid mar 4-4 kol pyrshah ïa ka Real Sociedad ha ka jingpynjlan por (extra time) ha ka sngi Balang na ka bynta ban tam da 5-4 ha ka aggregate.
Ka kol ba la thep khatduh da u Antonio Rudiger ha ka minit kaba 115 ka la pynthikna ïa kane ka kynhun ban ïakynduh final pyrshah ïa ka Barcelona ne ka Atletico Madrid.
Ka Real Sociedad kaba la rung sha kane ka jingïakhun ha kaba ka la shah rem da 1-0 kol ha ka wat kaba nyngkong, ka la ïoh ban thep kol nyngkong lyngba u Ander Barrenetxea (16), hynrei u Endrick (30) u la lah ban pynïakhaid na ka bynta ka Madrid.
Hadien katto katne por ba la bteng ha ka jingïakhun jong ka kylla miet ka Sociedad ka la ïoh biang sa shi kol na ka daw ka jingbakla thep hi da u David Alaba (72). Kane ka kynhun ka la thep biang sa ar kol lyngba u Mikel Oyarzabal (80 & 90+3). Ka Madrid ka la ïakhun tyngeh ha kaba ka la lah ban pynphai kylla lyngba u Jude Bellingham bad u Aurelien Tchouameni.
Dei ha ka extra time ba ka Madrid ka la ïoh ban thep biang sa shi kol lyngba u Rudiger na ka bynta ban pynlong ïa kane ka kynhun ban khur syndon ïa ka jingjop.
“Nga dap da ka jingkmen kaba khraw namar ba ka la long shisha ka jingïalehkai kaba eh bha hynrei nga la lah ban pynurlong ïa ka jingjop” ong u Rudiger ha ka Real Madrid TV. “Na ka bynta jong nga ka kol ka long kaba suk, nga la ïakhun tyngeh ha kane ka jingïalehkai na ka bynta ban jam sha ka phainal. Ka dei ka samoi kaba eh hynrei ngi don ha kawei pat ka jingïakhun phainal bad ngin sa jop ïa ka.”
Ha kane ka jingïakhun u Carlo Ancelotti u la pynïalehai da u Vinicius Junior bad u Rodrygo Goes, katba ïa u Kylian Mbappe la pynshong ben.
“Ka la long ka jingïalehkai kaba pynbyrngia bad bun ki kol, bun ki jingbakla bad bun kiei kiei kiba bha”, la pynpaw u Ancelotti. “Ka jingthmu ka jong ngi ka la urlong bad ngi la don mynta ha ka phainal.”
