Shillong, Ïaïong 02
U MLA ka BJP na Pynthorumkhrah uba dei ruh u Myntri ha ka Sorkar Jylla, Bah Alexander Laloo Hek u la ong ba ki bor ba nabar kim lah ban tuklar ïa ki kam ka ri India.
Ïa kane u la kynthoh halor ka jingkren u nongaibuit ïa ka Sorkar ba shipor ka Bangladesh, Md. Yunus uba la ong ba ka thaiñ Shatei Lam Mihngi ka India, ka la shah kerkut ha ki lum bad kam don lynti na duriaw bad u la khot ïa ka China ban pynïar ïa ki kam khaïi-pateng sha Bangladesh.
U Yunus u la kynthoh pynma ïa ki Jylla ka thaiñ Shatei Lam Mihngi ka Ri India ha ka jingleit ïuhkjat jong u ha China, ha kaba u la ong, “Ki hynñiew tylli ki Jylla ka India kiba don sha ka thaiñ Lam Mihngi, ki dei kiba la khot ki ‘Seven Sister’ (7 ngut shipara). Ki dei kiba don ha ka thaiñ ka bym don lynti ïaid jong ka India. Kim don lynti ban poi sha ka duriaw. Ka Bangladesh ka dei ka nongkhmih ïa ka duriaw, ïa ka thaiñ. Kane ka plie shibun ki lad. Kane ka lah ban dei ka jingpynïar ïa ka ïoh ka kot ka China”.
Haba ther tyngeh ïa kane ka jingkynthoh u Nongïalam ka ri Bangladesh, u Bah Hek u la ong ba ka Sorkar kan nym ailad satia ïa ki bor ba nabar ban wan tuklar bad ïa ki kam pohïing jong ka ri khamtam ïa ka thaiñ Shatei Lam Mihngi.
“Kino-Kino kiba kren pyrshah ïa kane ka ri ngin ym lah ban shah. Wat ïa ki briew nangne ngim lah shah kumno ngin lah shah ïa ki briew ba nabar. Ngin ym ailad ïa ki bor ba nabar ba kin wan tuklar ïa ka ri jong ngi, la ka dei ïa ka thaiñ Shatei Lam Mihngi ne kiwei ki Jylla ka ri, ka dei ka kamram jong ka ri jong ngi ka ban peit ïa ka bit ka biang ki Jylla bad ki nongshong shnong”, u la ong.
U la ong ba da lei-lei ruh yn ym ailad ïa ki bor ba nabar ban wan tuklar ha kane ka ri, khamtam ïa ka thaiñ Shatei Lam Mihngi.
Haba kylli, u Bah Hek u la ong ba shibun tylli ki shithi la dep ban thoh sha ka Sorkar Pdeng, bad mynta um sngew donkam ban thoh eiei shuh namar haduh mynta ka shnong suk shong saiñ.
“Ngi im suk im saiñ hangne mynta, balei ngin donkam ban thoh sha ka Sorkar Pdeng. Lada don kano-kano ka jingeh na ki bor ba nabar hangta ngin sa thoh. Mynta kam don kum kata ka bor ba nabar ban wan thombor ïa ka Jylla”, la ong u Nongïalam ka BJP.
