Nongpoh, Ïaïong 03
Ki Nongïalam jong lai tylli ki shnong ka thaiñ Umsiang ba kynthup ïa ka Umsiang Maiong, Umsiang Mawpdeng bad ka Umsiang Kraikejam kiba hap hapoh ka Raid Maiong ha ka sngi Palei ki la mih shahmat ban pynshai bad kyntait ba ka la don ka jingïadie jaka sop-sop ïa ka jaka Raid kaba heh kumba 300 akar ha ka dor T.100 klur sha ka Meghalaya Industrial Development Corporation (MIDC) kumba la pynmih khubor da ka Confederation of Ri Bhoi People (CoRP) ha kine ki khyndiat sngi ba la dep.
Haba kren sha ki lad pathai khubor, u Bah Pynshngain Shylla, Rangbah Shnong ka Umsiang Mawpdeng u la pynshai paidbah ba kim don satia ïa ka jaka Raid kumba la pynmih khubor da ka CoRP ha kine ki khyndiat sngi ba la dep, namar ba ïa ki jaka ha kitei ki shnong, ki dei beit ki jaka kiba long trai shimet.
Halor ka jingkynnoh jong ka CoRP ba ïa ka No Objection Certificate (NOC) la ai lyngba u Syiem bad ki Rangbah Shnong, u Bah Shylla u la pynshai ba ki Rangbah Shnong kim don satia kano kano ka bynta ban tuklar halor ka khyndew ka shyiap, hynrei ïa kane la ju leh da ki longsan mansan jong ka Raid bad ki Lyngdoh Raid kumba la ïalam naduh mynshwa.
Utei u rangbah u la pynpaw ïa ka jingsngewkitram halor katei ka jingkynnoh jong ka CoRP ba ki nongïalam shnong bad ki Syiem ki donkti ban die duh ïa ka ri Raid tang namar ka jingmyntoi shimet ka jong ki, ka long kaba la khor shaba palat da kaba pynshai ba lada leh kiwei kiwei ki shnong ne ki Raid, kata na ka liang ka jongki kim don jingtip satia, hynrei naduh ka 1 tarik u Ïaïong ba la pynmih ïa ka khubor tad haduh mynta ka sngi, na ka liang ka jong ki, kim pat tip eiei shaphang kane ka kam ïadie jaka bad ka MIDC.
Ha kajuh ka por, utei u nongïalam shnong u la buh ruh ka jingkyntu sha ka CoRP bad kiwei kiwei ki seng ka District ba hashwa ba kin pynmih ïa kino kino ki khubor kiba dei shisha ne ki bym dei ruh, ba kin kynjoh ktien lang ïa ki nongïalam shnong khnang ba kan nym ïalam bakla ïa ki paidbah.
