Shillong, Ïaïong 03
Ka Rongbiria ki Hima ka Ri Hynñiewtrep kaba laiphew ar kan long mynta ka sngi Thohdieng (4 tarik) ha madan Stadium jong ka Khatsawphra College kaba ha Mairang, Hima Nongkhlaw.
Ïa kane ka ïakop siatkhnam yn sdang ha ka por 10:30 mynstep ha kaba yn plie ïa ka da u Pa’Daloi Puramon Kynjing, Daloi Elaka Jowai kum u kongsan bad u Pa’iem Kestonbel Manik Syiemlieh, Deputy Syiem ka Hima Nongkhlaw kum u symbud kongsan.
Kane ka 4 tarik ka dei sngi kynmaw jong ka jaidbynriew ha kaba la rakhe ïa ka jinglong shynrang mynsiem u Pa’iem Tirot Sing Syiem, ban ïeng pyrshah ïa ka bor ki nongwei, la ong ka kyrwoh ba la pyllait da u Rgh. D.G. Kharpuri, Secretary ka Apphira Archery Committee bad u Pa’iem Phrestar Manik Syiemlieh, Syiem ka Hima Nongkhlaw.
