Nongpoh, Ïaïong 03
Ka Lamare SC ka la long ka lahduh ha ka Mait-shaphrang Cup 2025 ba la pynïaid da ka Khasi Students’ Union (KSU) Umsning Unit hadien ba ka la lah ban pynliem noh ïa ka Sumer FC lyngba ka tie-breaker da 6-5 kol ha ka sngi Palei.
Ha kane ka jingïakhun final kaba la long madan Patarim kaba ha Umsning, baroh ar ki kynhun ki la pyrshang ban ïakhun tyngeh naduh kaba sdang. Hapdeng jong ka jingïakhun ka Lamare ka la ïoh ban pynkhih jar nyngkong eh ha ka minit kaba 29 lyngba u Kevin Rymbai. Kane ka shi kol ka la nang pynïoh mynsiem ïa kane ka kynhun na ka bynta ban ïakhun tyngeh shuh shuh.
Wat la ka Sumer kam shym la lah ban pynphai ha ka kylla step, hynrei shwa ban wai ka jingïakhun ka la lah ban pynïakhaid kylla lyngba u Aibiang Nongneng ha ka minit kaba 81. Haduh kaba kut ka jingïalehkai kine ki kynhun kim shym la lah shuh ban thep kol biang. Te kumta na ka liang ki bor pynïaid ki la pynïashut ïa ka tie-breaker ha kaba ka Lamare ka la tam da 5-4 kol na ka bynta ban ïoh jingjop shisyndon ha kane ka lympung.
Lyngba kane ka nam jop ka Lamare ka la ïohpdiang ïa ka khusnam pisa kaba T. 5 lak nalor ka trophy, katba ka Sumer ka la ïoh T. 3 lak ryngkat bad ka Trophy. Ïa ka nam Best Goalkeeper la ïohpdiang da u rangapkol ka Lamare u Lambhamiki Lamare, Player of Tournament ka leit sha u Owan Pajuh na ka Sumer bad ka nam Player of the Match ha kane ka jingïakhun final la ïohpdiang da u rangthep kol ka Mawlai u Kevin Rymbai.
Ïa ki khusnam sha kitei ki kynhun la sam da u President ka Meghalaya Football Association (MFA) u Bah Hamletson Dohling kum u kongsan bad u President ka KSU u Bah Lambokstarwell Marngar kum u symbud kongsan ha kaba la ïadon lang ki dkhot ka KSU bad kiwei kiba la shah khot sngewbha.
