Shillong, Ïaïong 04
Ka Shillong Lajong kan mih sha madan na ka bynta ka jingïalehkai ba khatduh jong ka samoi ïalehkai I-League da ka jingthmu ban pyndep bad ban ïoh kiew ha ka kyrdan kaba kham hajrong jong ka miej kheiñ poiñ ha kaba kan ïakhun pyrshah ïa ka Delhi FC ha la ïing ha ka Sngi Saitjaiñ ha ka por 4 baje janmiet ha madan SSA Stadium, Shillong.
Mynta kane ka kynhun ka don ha ka kyrdan ba hynñiew ryngkat 27 poiñ na 21 tylli ki jingïalehkai. Ka thmu ruh ban ïoh ïa ka jingjop bad ka lah ban kiew sha ka kyrdan ba hynriew ka ban pynthikna ïa ka jingkut kaba donburom ka jingïalehkai jong ka.
Wat hapdeng ka samoi kaba jynjar, hynrei ka Delhi FC kan kut jingmut ban pyndep da ka jingjop. Kane ka kynhun kaba don lypa ha ka kyrdan sha trai duh jong ka miej kheiñ ryngkat tang 13 poiñ na 21 tylli ki jingïalehkai, ka kynhun kan thrang ban pyndep da ka jingïalehkai kaba bha.
Kine baroh ar tylli ki kynhun ki kwah ban pynkut ïa ka samoi ïalehkai da ka jingjop, ki nongkyrshan ki lah ban khmih lynti ïa ka jingïalehkai ka ban itynnad bad ïakhun tynngeh bha ha ka por ba sdang. Ka Shillong Lajong kan shim ïa ka lad ka kabu namar ka jingïalehkai ha la ïing, katba ka Delhi FC kan ïaleh katba lah ban ym mad jingrem.
Haba ïadei bad kane ka jingïalehkai la die ruh ïa ki tiket naduh ka Sngi Thohdieng kumjuh la Sngi Saitjaiñ kaba dei ka sngi ïalehkai bad lah ruh ban ïoh na kine ki jaka, Electronic Centre (Police Bazaar), Cafe Shillong (Laitumkhrah) bad na madan SSA Stadium Ticket Counter (Polo). Yn pyni live ruh ïa kane ka jingïalehkai na ka channel Sony Sports, ka SSEN mobile app bad na ka ssen.co website.
