Shillong, Ïaïong 04
U MLA shah sospon ka Voice of the People Party (VPP) na North-Shillong, Bah Adelbert Nongrum ha ka Sngi Thohdieng u la pynsngew ba u long uba kloi ban panmap lada u bakla bad kyrpad ïa ki nongïalam ka VPP ban khot ïakren ïa u halor ki kynrum-kynram kiba la mih hapdeng jong u bad ka seng ha kine ki khyndiat por ba la dep.
“Tang kane kawei, ngan ym hun, ngan ym pdiang, lada phim khot ïa ngi markhmat…khot ïa ngi, ngin ïakren haba shit haba shai bad kum ki rangbah. Lada ka dei ba nga bakla, ngan panmap, ngan dem, ngan nguh ïa kita kiba kwah ïa kata na nga. Lada phi bakla ma phi, kam pher, ngan shu ong ‘Forgive and Forget’,” ong u Bah Nongrum haba kren sha ki lad pathai khubor.
Hashuwa, na ka liang u Bah Nongrum u la pynpaw ba shuwa jong ka ilekshon MDC, u la dep ïakren bad u President ka VPP, Bah Ardent M. Basaïawmoit ban khot ïakren noh ïa u lem bad 4 ngut kiwei pat ki para-dkhot jong ka seng ban pyndep ïa kiei-kiei baroh naba ym lah shuh ban ïapeiñ ne ban duh noh ïa ka lad ban ai ka jingkyrmen ïa ka jaidbynriew.
“Hynrei namar ha kito ki por ba dei shuwa ka ilekshon bad u President u ong ba um don por, hooid, ngi ïohi ïa ka jingtrei shitom jong u President, hynrei kaba kham hakhmat bad khraw eh ka dei kaba ngin ïakynduh la ka dei tang shi kynta ne ar kynta ka la biang, hynrei kam shym la urlong bad ngi ruh ngi la shu ap noh,” u la ong.
Haba kren halor ka jingshah sospon, u MLA u la ong ba kumba u nongaiktien ka seng, Dr. Batskhem Myrboh u la pynpaw ba ïa ka kam jong u yn sa ïakren hadien ka MDC, u la ong, “Mut dei kane kaba ki la pynpaw, ki la buh lypa ïa ka rai, ka shu long ba kim pat pynpaw pat sha ki paidbah ïoh ka ktah pat ïa ka ilekshon lada shim kano-kano ka rai pyrshah ïa nga.”
Haba kdew ba u la jubab ïa ka ‘Show Cause’ jong ka seng da ka jingthoh, u la ong, “Hynrei kumno ki hun haba ngi la don bynta lang ban pynlong doh long snam ïa ka VPP. Kane ka jingsospon jong ki 3 snem ka long hi kumba ki la beh ïa nga.”
Halor ka rai ba la shim da ka VPP ba ym don mano-mano ba halor jong ka seng, u Bah Nongrum u la pynpaw ba ha u hi, lada dei ka seng ne ka riti synshar – haba ïadei bad kano-kano ka mat, ka jingïatip lem ka khraw bun shah ban ïa ka aiñ kaba shu thoh.
“Ngam kwah shuh ban kren eiei shaphang jong ki, ngam kwah ruh ban kren eiei shaphang jong nga…nga shu kwah tang ban ai jingshai, ban bet ïa uta u symbai ka jingshai sha ki paidbah khnang ba kin sngewthuh,” u la ong.
Ha kawei ka liang, haba pynsngew ba um pat pdiang satia ïa katei ka bynta, u la ong, “Ngam pdiang namar kan eh aïu keiñ ba kin khot (hooid ki la ai ka ‘Show Cause’ da ka jingthoh, nga ruh nga la dep pynphai da ka jingthoh), kumno ki hun haba ngi la pynlong doh long snam lang ïa ka VPP. Nga sngewkmen, nga sngew sarong haba nga ïohi ba ki paidbah ki ieid ïa ka VPP. Ki dei ban ieid namar ma ngi, ngi la hikai ïa ki paidbah ba kin ieid ïa ka VPP…ïa u prah.”
Haba pynshai shuh-shuh halor kane ka bynta, u Bah Nongrum u la ong, “Balei ka leit ïaid lait…nga kwah ban ong tang kane kawei, lada ïa ka jingïateh jong ka jaidbynriew la pynkheiñ, kumno ngan shaniah pat ïa ki. Nga khlem mih na ka seng, nga khlem leh ïa kaei-kaei ka ban pynbudnam ïa ka seng. Nga leh ïa kaei-kaei ka ban kyntiew ïa ka jaidbynriew bad ban ïohnong ka VPP.”
“Ngam long ‘anti-party’, nga long ‘anti-procedure’…namar kaei kaba la thoh ha ka riti synshar, ki ïaid lait na kata ka riti synshar, ma ki keiñ ki dei ban sngewthuh bad bishar, ym dei ma nga uba pynkheiñ ïa ka riti synshar,” la ong une u nongmihkhmat.
Shuh shuh u la bynrap, “Lada nga long ‘anti-party’, ngan jin da la mih bad kynthoh ïa ka seng bad kyrshan ïa kiwei…hashuwa ban thep ‘vote’ nga dang kren ba ma nga bad ka ïing ka sem jong nga ngin kyrshan ïa u Prah, hato kane ka dei ‘anti-party’ ne ka dei tang ka jingai daw ba phi la wit ïa nga? Ha ka CEC nga la dep pynsngew lai sien ba lada phi wit bad ym don jingshaniah shuh ha nga, beh seng beit ïa nga, ym donkam ‘Show Cause’, ym donkam sospon, beh seng beit.”
Haba jubab, u la ong “Ha shuwa ba ngan kylla ïa ki nongrim jong nga, ngan ieh noh ïa kiei-kiei baroh.”
