Shillong, Ïaïong 04
U rangïalehkai kriket ba pawnam jong ka ri India, Sachin Tendulkar u la wan poi ha kad liengsuiñ Guwahati ha ka Sngi Palei shwa ba un wan poi sha Shillong.
U Tendulkar, u don mynta ha ka jingleit jngoh kai shimet sha Meghalaya ryngkat bad ka ïing ka sem. Hynne ka sngi (Sngi Thohdieng) u la leit sha Sohra ryngkat ki bahaïing bahasem jong u lem bad ki bor pahara ban ïohi da la ki jong ki khmat ïa ka jingitynnad ka mariang ha Sohra.
La khmih lynti ba un sah ha Meghalaya tang katto-katne sngi shwa ba un leit sa sha Kaziranga National Park ha Assam, ha kaba u thmu ban pynlut tang ar sngi.
U Tendulkar, un leit phai noh sha Mumbai ha ka 9 tarik u Ïaïong.
