Shillong, Ïaïong 06
Ha ka sien kaba nyngkong eh ka nongbah Shillong ka la pynlong ïa kawei na ki jingïalehkai ba kham pher ba la tip kum ka ‘Skate and BMX Jam’ ha ka skulbah jong ka North Eastern Hill University (NEHU) ha ka sngi Saitjaiñ.
Ïa kane ka ïakob la plie da u Myntri ka tnat ïalehkai ka Sorkar Jylla u Bah Shakliar Warjri. Ïa kane ka jingïalehkai la pynlong da ka Minusone ryngkat ka jingkyrshan lang da ka tnat ïalehkai ka Sorkar Jylla bad ka NEHU.
Haba ai jingkren ha kane ka sngi, na ka liang u Bah Shakliar u la sam ïa ki kyntien ai mynsiem, da kaba kdew ba ka thong jong ka sorkar ka long ban pynbiang ïa ka rynsan na ka bynta ki samla. U la ban jur ba ka jingthmu jong ka sorkar ka long ban bei tyngka na ka bynta ki samla bad ban pynbiang ïa ki jingdonkam babha tam na ka bynta jong ki.
U Bah Warjri u la pynpaw ba ka jingbei tyngka ha ki kam ïalehkai ka lah ban pynlong ïa ka jingjop kaba khraw ha ka jingpynwan dur ïa ki jingïalehkai ha ka Jylla. U la pynskhem biang ïa ka jingthmu jong ka sorkar na ka bynta ka jingbit jingbiang ki khun samla ha ki kam ïalehkai.
Ka jingpynlong ïa kane ka ‘Skate and Bmx Jam’ ha ka sien kaba nyngkong ha ka nongbah la sakhi ïa ka jingwan shim bynta da palat 70 ngut ki nongïashim bynta na kylleng ka ri India, ba kynthup ïa 45 ngut ki nongñiah skate na ki jylla bapher bapher jong ka ri India bad 25 ngut kiba napoh ka Jylla. Katba ka sngi ka nang ïaid, ki nongñiah ba tbit kiba la pyni ïa ki sap ki jong ki.
