Shillong, Ïaïong 06
Ka shi kol ba la thep da u khlur ïalehkai ka ri, u Sunil Chhetri ka la biang pura ïa ka Bengaluru FC ban jam sha ka final ha ka Indian Super League (ISL) 2024-25 hadien ba la tam da 3-2 lyngba ka aggregate ïa ka FC Goa ha ka Sngi U Blei ha Goa.
Kane ka jinglah ban pynurlong ka dei lyngba ka jingjop ha ka semi final wat ba nyngkong ha la ïing da 2-0 kol ha ka taïew ba la lah, hynrei ha ka wat kaba ar ka la shah rem da 2-1 kol. Ha ki hynriew snem mynshwa ka BFC ka la long teng ka lahduh ha ka ISL 2018-19.
Wat la ka Borja Herrera bad u Armando Sadiku ki la lah ban thep kol ha kane ka jingïakhun ka wat kaba ar, hynrei hashwa ban wai u Chhetri uba la ïoh ïa ka nam Player of the Match, u la lah ban pynurlong ïa ka BFC.
Kumba ka paw ha kane ka jingïakhun baroh ar ki kynhun ki la pyrshah ban ïakhun tyngeh naduh kaba sdang ha kaba ki la ïoh ïa ki kabu kiba biang, hynrei kim shym la lah ban thep kol. Wat la kine ki kynhun kim shym la lah ban thep kol ha ka kylla step, pynban ka FC Goa ka la lah ban pynurlong ha ka kylla miet lyngba ka free-kick ba la shut da u Borja Herrera (69). Kane ka shi kol ka la nangpynïoh mynsiem ïa ki rangïalehkai kane ka kynhun jong u Manolo Marquez ban ïai bteng ha ka ban ïakhun tyngeh shuh shuh ha kaba ka la ïoh ïa ki kabu kiba biang lyngba u Udanta Singh bad u Iker Guarrotxena, hynrei kam shym la lah ban thep na ka daw ka jingïashan tyngeh u rangapkol ka Bengaluru u Gurpreet Singh Sandhu, uba la lah ban ïeng skhem kum ka kynroh na ka bynta ban pyllait na ka jingshah thep.
Ka jingïai pyrshang ka FC Goa ka la urlong biang ha kaba ka la thep biang ïa ka kol kaba ar lyngba u Armando Sadiku, uba la ïoh ban pyndei ïa ka bol hapoh box lyngba ka jingïarap pynbuh da u Aakash Sangwan ha ka minit kaba 88.
Shwa ban wai ka Bengaluru ka la lah ban pynphai kylla shi kol lyngba u Sunil Chhetri (90+2), uba la pyndei da ka khlieh hapoh box hadien ka jingiarap pynbuh da u Namgyal Bhutia. Kane ka long ka kol kaba 75 jong u Chhetri uba la lah ban thep ha 182 tylli ki jingïakhun ha ka ISL.
Haba phai sha kawei pat ka semi final kaba ar, ka Jamshedpur FC bad ka Mohun Bagan Super Giant kin pynkhreh ban ïakhun tyngeh ha ka lah sngi U Blei ha Vivekanan -da Yuba Bharati Krira-ngan (VYBK) ha ka por 7:30 janmiet na ka bynta ban ïoh rung sha ka final.
Ka Jamshedpur hapoh ka jingïalam u Khalid Jamil ka la jop da 2-1 kol ha ka wat kaba nyngkong, kaba la pynkut noh ïa ka jingbym shah rem ka MBSG ha kane ka lympung. Te kumta ka MBSG kaba la jop ïa ka League Shield, ka dangdon jingkyrmen ban ïalehkai bha hakhmat ki paidbah nongkyrshan ha la ïing.
