Shillong, Ïaïong 06
Ka Churchill Brothers ka la thaw ïa ka khana pateng na ka bynta ban long ka lahduh ha ka lympung ïalehkai I-League hadien ba ka la ïakhaid mar 1-1 kol pyrshah ïa ka Real Kashmir ha ka jingïakhun kaba khatduh kaba la long ha ka Sngi U Blei.
Kane ka kynhun kaba na Goa ka la pynkut ïa ka samoi ïalehkai da kaba ïoh 40 poiñ na 22 tylli ki jingïakhun bad mynta ka la kiew kyrdan sha ka Indian Super League (ISL).
Wat la ka la long ka lahduh hynrei ka jingkylli kaba la mih ka long, hato ka Churchill Brothers kan ïalehkai shisha ne em ha ka ISL?
Ka ISL, kaba la sdang naduh ka aïom ïalehkai ha u snem 2014, ha kaba kut ka la kylla long ka kynhun ïalehkai ba paw jong ka ri India ha u snem 2022, bad ka la nangkiew sha ka rukom ïalehkai naduh kata ka por.
Ka Punjab FC ka la rung sha kane ka lympung ha u snem 2023, katba ka Mohammedan Sporting ka la bud ha u snem ba la lah, ha kaba baroh ar ki la jop ïa ka I-League ha la ki jong ki samoi ïalehkai jong ki.
Hynrei ka jingïateh kular hapdeng ka Football Sports Develop -ment Limited (FSDL), ka kynhun kaba pynïaid ïa ka ISL bad ka All India Football Federation (AIFF) kan kut noh ha u bnai Nohprah jong u snem 2025. Ka jingïateh kular shaphang ka lawei jong ka kynhun ïalehkai ba ha khlieh duh jong ka ri India ka danghap ban ïa mynjur lang da kine ki arliang mamla, kaba la pynlong ïa ka ISL ban dangsah ha ka umdum la kan dangbteng ne em ha ka aïom ka ban wan.
Kumba ka paw ka Churchill Brothers kan sa ïalehkai ha ka kyrdan ba ha khliehduh jong ka phutbol ki shynrang, hynrei ym pat lah ban pynthikna la yn dang khot da kajuh ka kyrteng. Hynrei ka long kaba lah ba ïa kane ka lympung kan bteng kum ka ISL bad kan don 14 tylli ki kynhun.
Katkum ka Vision 2047, ka lynti ïaid jong ka synjuk na ka bynta ki 25 snem ban wan, ka AIFF ka thmu ban don haduh 40 tylli ki kynhun ha ki lai tylli ki kyrdan ba hakhmat eh jong ka phutbol India. Kine ki kynthup ïa 14 tylli ha ka ISL, 14 tylli ha ka Second division bad 12 tylli ha ka Third Division.
