Shillong, Ïaïong 06
Ka Dorbar Shnong Umrynjah ka la pynbna paidbah ba ka khang bad mana ban tih maw tih shyiap ne khlong maw khlong shyiap hapoh u pud u sam jong ka shnong jong ka.
Ïa kane ka rai ka Dorbar Shnong Umrynjah ka la shim ha ka jingïalang jong ka executive committee ka DS Umrynjah kaba la long ha ka 5 tarik u Ïaïong, 2025 ka sngi Saitjaiñ ha ïing shnong.
“Ngi la rai ban pynbna paidbah ba ngin nym shah shuh ïano ïano ban khlong maw khlong shyiap ne ban tih maw tih shyiap ha ka shi lynter jong ka wah Umiam kaba hap hapoh u pud u sam jong ka shnong Umrynjah, naduh thwei Jaklong haduh phud Umpling Umphrew,” ong u Rangbah Shnong Bah PR Thabah ha ka kyrwoh khubor ba la phah.
U la ong, “Kane ka rai kan treikam naduh ka 7 tarik u Ïaïong, 2025 bad lada lap ïa kino kino kiba ïaleh pyrshah, yn pynshitom katkum ki kyndon aiñ jong ka shnong.”
