Shillong, Ïaïong 07
Ka Mohun Bagan Super Giant ka la don jingkyrmen ban rah biang ïa ka nam lahduh ha ka Indian Super League ha ka sien kaba lai, hadien ba ka la lah ban pynthikna ban jam sha final lyngba ka jingjop ïa ka Jamshedpur FC da 2-0 kol na ka bynta ban tam da 3-2 lyngba ka aggregate.
Kane ka la wan urlong lyngba u Jason Cummings bad u Lalengmawia Ralte na ka bynta ban pynlong ïa katei ka kynhun ba khlaiñ bor na Kolkata ban ïaknieh nam lahduh pyrshah ïa ka Bengaluru FC ha ka sngi Saitjaiñ.
Wat la ha ka wat kaba nyngkong ka Jamshedpur ka la jop ïa ka Mohun Bagan da 2-1 kol, pynban ha kane ka wat kaba ar baroh ar ki la pyrshang ban ïakhun tyngeh naduh kaba sdang ha kaba kim shym la lah ban thep kol haduh kaba kut jong ka kylla step.
Dei ha ka kylla miet ba ka Mohun Bagan ka la ïoh ban pynkhih jar lyngba ka penalty ba la shut da u Jason Cummings ha ka minit kaba 51. Kane ka shi kol ka la nangpynïoh mynsiem ïa kane ka kynhun na ka bynta ban bteng ha ka ban ïakhun tyngeh shuh shuh.
Hapdeng ka jingïoh ïa ki kabu kiba biang, hynrei ka MBSG kam shym la lah ban pynurlong. Ha shwa ban wai artad ka Mohun Bagan ka la thep biang ïa ka kol kaba ar lyngba u Lalengmawia Ralte (Apuia), uba la khyrwit jlang shapoh kol hadien ka jingïarap pynbuh da u Anirudh Thapa ha ka minit kaba 90+4 bad u rangapkol ka Jamshedpur um shym la lah shuh ban pyllait na ka jingshah thep.
