Shillong, Ïaïong 07
Wat la shi snem mynshwa u Rudrankksh Patil u la duh ban shim bynta ha ka Paris Olympic 2024, hynrei mynta ka kynti utei u nongjop barim jong ka pyrthei, u la khur ïa ka ksiar ha ka Buenos Aires World Cup ha ka Sngi U Blei.
Ha ka jingïakop phainal jong ka 10m air rifle, u Patil u la ïoh 252.9 na ka bynta ban wan ha ka kyrdan ba ha khlieh duh. Uwei pat u nongïashim bynta ha ka Paris Games, u Arjun Babuta ruh u la ïoh ban rung sha ka phainal, hynrei um shym la lah ban pynurlong hadien ba u la wan ha ka kyrdan hynriew ryngkat 144.9.
U Patil nongïalehkai jong ka Maharashtra, 21 snem ka rta, uba la ïoh ïa ka bhah na ka bynta ka Paris Games, u la hap ban duh noh ïa ka jingïashim bynta ha ka Olympic, hadien ba u la shah rem noh ha u Sandeep Singh ha ki jingpyrshang (trial).
“Nga sngewkmen ban wanphai biang. Nga la lah ban ïalehkai bha ha ka por ka jingïakhun bad kyrmen ban bteng ïa ka dur ha ka phainal. Ngam shym la poi pyrkhat ban jam sha ka phainal,” u la bynrap.
U Babuta u dei nongïalehkai ba ha khlieh duh hadien ba u la ïoh 634.5 ha ka kyrdan ïakhun, katba u Patil u la siat 633.7 na ka bynta ka kyrdan ba ar.
