Shillong, Ïaïong 08
Ka Jaiñtia Student’s Union (JSU) Jowai Circle ha ka Sngi Ba-ar ka la leit ban ïakynduh ïa u Deputy Commissioner (DC) jong ka West Jaiñtia Hills District ban pynpaw ïa ki jingeh bad khamtam lei halor ki jingjia tyngkhuh kali khah-khah ha ki katto-katne ki bynta kiba kham kongsan.
Ki Nongïalam ka JSU Jowai Circle hapoh ka jingïalam u President u samla Borntifulson Rupon ha kane ka jingïakynduh ïa u DC, ki la ïoh ban ïakren halor ki mat ba donkam bad khamtam lei halor ki jingjia tyngkhuh kali khah-khah.
Ka seng ka la pynpaw hakhmat u DC, halor ki jingjia tyngkhuh kali kiba la jia khah-khah hajan Jowai Civil Hospital ba don ha Ialong bad ha kiwei pat ki jaka kum ha Lad Woodland Hospital Sabahmuswang bad Lad Jowai Bypass ha kaba bunsien la duh ïa ki mynsiem briew na kine ki jingjia. Ha kaba ïadei bad kane ka bynta, ka seng ha kane ka jingïakren bad u khliehduh ka District ka la dawa ruh ba dei ban buh noh da ki Speed Breakers, Divider Lanes bad ki Clear Road Signs ha kine ki jaka ba ju jia khah-khah ki jingïatyngkhuh kali khnang ban ïada na kum kine ki jingjia ba sngewsih.
Na ka liang u DC u la kular ban shimkhia halor kane ka mat bad ka seng ka la kyntu ruh ïa ka NHAI bad ka tnat PWD Road ban leh ïa kaba donkam khnang ba kan pynsuk ïa ka leit ka wan jong u paidbah bad ban ïada ïa u paidbah babun balang.
