Shillong, Ïaïong 08
Hadien ka jingshah ujor bad shah kynnoh u Bah Kimfa S Marbañiang MLA barim ka Rambrai bad u kpa, Paul Leong ba ki la leit thombor bad thang ïa lai tylli ki ïing ha ka ‘Law Ksaw, ha ka Sngi Ba-ar na ka liang ki kmie jong u Bah Kimfa, kiba dei 3 ngut shipara ba kynthup ïa ka Kong Seltimoris Marbañiang (Meiheh), Kong Memo-ries Marbañiang (Nah-nah) bad Kong Beldaris Marbañiang (Meideng) ki la pynshai ba ka dei tang ka jingpharep jong ki briew kiba thmu ban leit shong ei ha katei ka jaka.
Kine ki longkmie kiba kam ba ki dei ki trai jong katei ka khlaw kaba heh kumba 33 Square Kilometer, ki la pyni ruh ïa ki kot ki sla bad ki dulir khyndew ban pynskhem ïa ka jinglong trai jong ki ïa katei ka jaka kaba don ha Mawthylliang Mawpayier, Rambrai Syiemship.
Na ka liang ka Kong Seltimoris Marbañiang ka la pynpaw ka jingkyndit ban ïohi ha ki lad pathai khubor ïa ki jingkynnoh, ha kaba ka la ïathuh ba katei ka jaka ka dei kaba la thied naduh ki kmie ki kpa bad baroh ki tip ba ka dei ka jaka jong ki naduh ka Hima Rambrai.
Ka la ïathuh ba ïa katei ka jaka la shu ai wai ban rep ban shong ban sah kiba rep ha katei ka khlaw.
Ka la ong ba ki briew kiba kynnoh ki dei kiba dang shu wan mynta dang lai bnai, bad ki bym dei ki nongshong shnong ka thaiñ.
La ïathuh ruh ba ha shwa jong kane na ka liang u Bah Kimfa u la ujor da ka ejahar la arsien ha u bnai Kyllalyngkot bad Lber mynta u snem pyrshah ïa ki briew kiba la sah be-aiñ, bad na ka liang ki pulit ruh ki la leit ban pynsngewthuh ïa kitei ki briew ba kim dei ban sah be-aiñ ha katei ka jaka.
Kane ka longkmie ka la ïathuh ruh ba ki don ïa ki kot ki sla kiba biang kynthup ki dulir ban pynshisha ba ki long trai ïa katei ka jaka, bad bynrap ba ha ki por ba la dep ruh ka la don ka jingïakhun mukotduma, kaba ki la jop hadien ba ki la pyni ïa ki sakhi lyngba ki kot ki sla bad ka dulir khyndew.
Na ka liang ka Kong Memories Marbañiang ka la ong ba kum ka ïing ki kyndit ban ïohi ïa ka jingshah pharep bad pynpaw ka jingsngewsih ba ki pharep ïa u Bah Kimfa uba don sha shnong ban peit ïa ki kam ki jam.
Haba kylli halor ka jingshah ujor ejahar u Bah Kimfa bad Paul Leong halor ka jingkynnoh ba ki la leit ban thombor da kaba thang ïa lai tylli ki ïing bad siat ruh da ka pistol ban pyntieng ïa u Bah Rajiv Mawnai, na ka liang kine ki longkmie ki la kyntait ban kren eiei da kaba ki la ong ba kim don ha katei ka por bad kim lah ban kren eiei, hynrei ki shaniah ha ki bor ka aiñ ban leh ïa kaba donkam.
“Ngim lah ban kren eiei halor kata ka jingkynnoh jong ki namar ba ngim don hangto, ai ba ka aiñ kan shimti ïa ka kam”, ki la ong, bad bynrap ba ka ïing kan sa ujor kylla ïa ka briew kaba kynnoh namar ma ka rum kam don ha kato ka jaka ha ka por ba mih ka jingjia.
Lah ban kdew ba ka Kong Andra Mawnai, Plor Mawnai, Ebania Mawnai, Langier Mawnai ki la ujor da ka ejahar ha thanat Nongstoiñ, ha kaba la kynnoh ba ha ka 6 tarik mynta u Ïaïong ha ka por 7 baje mynstep u Paul Leong bad u Bah Kimfa Sidney Marbañiang kiba dei shikpa shikhun ki la leit sha ïingsah kaba dei ruh ka jaka rep jong ka Kong Andra Mawnai, Noberstar Mawnai, Rajiv Mawnai, Plor Mawnai, Ebania Mawnai bad Langier Mawnai ha ‘Law ksaw, Rambrai Syiemship.
Katkum ka ejahar la kynnoh ba kitei ar ngut ki la leit byrngem-byrsit haduh ba u Paul Leong u la sei da ka pistol bad siat sha suiñ ban pyntieng ïa u Rajiv Mawnai bad thang ruh ïa lai tylli ki ïing bad baroh ki jingdon-jingem.
