Shillong, Ïaïong 08
Kan long ka sien kaba nyngkong eh ba ka kynhun ïalehkai Under-18 ka Jylla kan leit ban shah pyntbit ha ka Olympique Lyonnais Academy kaba long kawei na ki shlem saiñdur phutbol ha Europe.
Ïa kane ka pynpaw da u Myntri Rangbah ka jylla, Conrad K Sangma ha ka Sngi Ba-ar ha ka jingpynkup burom ïa ka kynhun ïalehkai phutbol ka Jylla ka Myngken Christian Higher Secon-dary School halor ka jinglah ban ïalehkai bha na ka bynta ban wan ha ka kyrdan ba lai ha ka 2nd Indo-French kaba la kut dangshen ha Paris, France.
Ha katei ka jingïalang u Conrad u la pyntip da kaba ong, “Ka Olympique Lyonnais Academy kaba long kawei na ki shlem saiñdur ha ka phutbol ha Europe, ka la khot kyrpang ïa ka kynhun ïalehkai Under-18 ka Jylla na ka bynta ka jingleit kaba 20 sngi ban shah hikai ha katei ka shlem kaba paw na France ha u Jylliew mynta u snem 2025.”
Ïa kane ka jingpynkup burom la pynlong ha secretariat ha kaba la ïadon lang u Director ka tnat ïalehkai u D.D Shira, u President ka Meghalaya Football Association Bah Hamletson Dohling, u Secretary Bah Sunesh Syiem bad kiwei kiwei.
U myntri rangbah u la ong ba katei ka kynhun ïalehkai jong ka Myngken Christian ka la pyni ïa ka jingtbit, ka jingkut jingmut, bad ka jinglah ïalehkai bha ha katei ka lympung ïalehkai, bad u la ong ba ka long ka jingsngew sarong ban mihkhmat ïa ka ri India sha Paris.
Shuh shuh u la pynbna ruh ba na ka liang ka Sorkar Jylla ka la ai jingkyrshan ha kane ka jingïaid lynti ïa katei ka kynhun da kaba ka la pynlut T. 50 lak tyngka na ka bynta ka leit ka wan jong ki.
Kum ban shu pynkynmaw ha katei ka jingleit shim bynta ha ka 2nd Indo-French, ka Myngken Christian ka la jop da 4-0 kol ïa ka Grigny FC bad hadien ka la ïakhaid mar 1-1 kol ïa ka Versailles FC.
