Shillong, Ïaïong 09
Ki ar tylli ki kynhun jong samla pule ba kynthup ïa ka North-Eastern Hill University Students’ Union (NEHUSU) bad ka Khasi Students’ Union (KSU), NEHU Unit, ki la kyrpad ïa ka Prof. Sherwin M. Sungoh ban iehnoh ïa ka kam Pro Vice-Chancellor kaba la bynshet ha ka naba kam shym la ïaid katkum ki rukom treikam ba la kdew ha ki kyndon jong ka skulbah.
“Na ka liang ka NEHUSU bad ka KSU, NEHU Unit, ki thoh da ka jingburom ban kyntu ïa phi ba phin aiti noh ïa ka shithi iehnoh kam na ka kam Pro Vice-Chancellor jong ka NEHU, Shillong Cam-pus,” ong ki nongïalam jong ar seng ha ka shithi ba la phah sha ka Prof. Sungoh.
Ki nongïalam ki la kdew ba ka jingshah thung ha kane ka kam, kam shym la ïaid katkum ki rukom treikam ba la buh bad kdew ha ka ‘Statutes’ ka NEHU, bad hadien la pynbna ba kam treikam shuh da u Vice-Chancellor, In-charge (ha kata ka por) ha u bnai Naiwieng, 2024.
“Ka rukom treikam kaba la bud haba ïadei bad ka jingthung ïa phi, kaba la saiñdur hapoh ka bor jong u Prof. Shukla, ka ïeng kum ka rukom treikam kaba be-aiñ bad ym shym la pynskhem da ka jingbun paid jong ka Executive Council – kaba la pynlong ban leh palat ban ïa bor kaba la ai,” ki la ong.
Ki la ong ruh ba u Prof. Shukla, uba la aiti ïa ka shithi thungkam, u la don hapdeng ka shuti kaba la pynjlan naduh ka 3 tarik Naiwieng, 2024, bad um shym la pynïasoh (sha ka kam) ha Headquarter ka NEHU, Shillong haduh kine ki sngi.
“Kane ka jingpep jong u kaba bteng-mynta la palat 150 sngi-ka la pyntlot ïa ka jinglong hok jong kino-kino ki rai pynïaid kam ba la shim ha kane ka por. Ka shithi thung kam hi ka kdew sha ka ‘Statute 3’ jong ka NEHU, kaba bthah ïa ki rukom treikam ki bym shym la bud ryntih,” ki la ong.
Ki nongïalam ka NEHUSU bad KSU ki la ong ruh ba ka Executive Council kam shym la pynlong ïa ka jingïalang kaba tikna ban ïakren ne mynjur haba ïadei bad ka jingthung ïa ki Pro Vice-Chancellor bad u Prof. Omkar Singh, (uba don hapdeng ka shuti), u la pynmih ïa ki jingbthah khlem da ai jingbit ne khlem da bud ryntih ïa ki rukom treikam.
“Ngi sngewkhia jur ba phi la pynïahap ïalade bad u Prof. Shukla – uba ïa ki kam jong u la pyrshah jur da baroh ki nongïashim bynta, kynthup ïa ki MP na Meghalaya, u Dr. Ricky A. J. Syngkon (Shillong) bad Saleng A. Sangma (Tura) – kiba la rah ïa kane ka mat ha ka Dorbar ba dang ïaid jong ka Parliament. Ka tnad pule-puthi haduh mynta kam pat lah ban pyllait ïa ki jinglap jong ka ‘Inquiry Committee’ halor ka jingleh u Prof. Shukla, bad kumta ym lah ban ong ba u donkti halor ki jingkynnoh pyrshah ïa u, kynthup ïa kito kiba pynpaw ïa ki jingsngew pyrshah ‘riewlum bad pyrshah ïa ka Meghalaya,” ki la ong.
Shuh shuh ki la bynrap, “Ka seng ka kwah ban pyntip ha phi ba ki kyndon ka tnad pule-puthi ka Sorkar Pdeng ki khang pyrshah ban thung ïa ki briew ha ki kam (ba la buh da ka aiñ) hapoh 3 bnai shuwa ba kin shongthait. Naba ka jingshongthait jong phi kan long ha ka 31 tarik Jymmang, 2025, ka jingshah thung jong phi kum ka Pro Vice-Chancellor ka pynkheiñ ïa kane ka jingbthah. Ïa kane kajuh ka kyndon la pyntreikam dang shen ha u bnai Kyllalyngkot, 2025 ha ka jingjia kaba lah ban ïanujor da u Acting Vice-Chancellor.”
Haba ban biang halor ka jingkyrpad ïa ka Prof. Sungoh ban iehnoh mon sngewbha ïa ka kam Pro Vice-Chancellor jong ka NEHU, Shillong, ki nongïalam ki la ong, “Lada ym shimkhia ïa kane ka jingkyrpad, kan pynbor ïa ngi ban pyrkhat ha ka ban shim da ki lad ki lynti kiba ïahap.”
