Shillong, Ïaïong 09
U MLA ka North Shillong, Bah Adelbert Nongrum uba la poi lang ha ka jingïakhih pyrshah Aadhaar ka Awaken India Movement (AIM) hakhmat u mot Kiang Nangbah kaba don pyrshah ïa ka Civil Hospital Shillong u la ong ba mynta u la laitluid naduh ba u la shah pynsangeh treikam shipor ha ka Voice of the People Party hynrei un dang ïakren na bynta ka sur ki paidbah.
U la ong ba u khlem leh bakla bad lada u leh bakla u kloi ban dem khohsiew ban panmab, hynrei kim nud ban khot ïa u namar ki don ka jingthmu ba sha lyndet namar ba ki kwah ïa u ban long u ñiangkohnguh.
“Ngam dei u ‘Yes man’, hynrei nga dei ‘Yes Man’ tang ha u Blei” u la ong.
U la ong ka kam ka kren khamjam ban ïa ka ktien bad pynpaw ïa ka jingsngewkhia haba mih tang ki kynthei ha kane ka jingïakhih hynrei ki shynrang ki duna bad tang khyndiat ngut ki rangbah kiba wan sha kane ka jingïakhih.
U Bah Adelbert haba kren ha kane ka jingïalang u la ong ruh ba balei ka Sorkar kam pynmih ïa ka aiñ ban ong ba ki bym ïoh Aadhaar kin nym ïoh thep vote, namar ban ïohnong ma ki, ka biang hynrei ban ïoh nong ki paidbah ki pynsyllang.
Ha kane ka sngi la ïohi ba u Bah Adelbert u la wan mih ban don ha ka liang ki nongïalam AIM ban ïakren ruh bad ki pulit haba ki paidbah ki thmu ban tur sha Secretariat hynrei haba ki paidbah ki la tur sha Secretariat ym shym la ïohi shuh.
Ka jingïakhih ka AIM ka long ban pyrshah ïa ka jingshah pynbor ban leh Aadhar card hynrei haba ki thmu ban leit ai jingthoh sha ka Sorkar ki la shah khang lynti noh ha ki pulit.
