Shillong, Ïaïong 09
Ka 4 FOR ALL kan pynlong ïa ka Season 5 Tyger-India Khelo Football Trial ha Umroh bad Tyrsad ha ka 12 tarik bad 19 tarik mynta u bnai.
Kane ka dei ka kabu kaba phylla na ka bynta ki samla kiba don sap ban pyni ïa la ka sap bad ban shim ïa ka sienjam sha ka jingïalehkai phutbol kaba tbit. Ki jingpyrshang ki long na ka bynta ki khynnah shynrang bad kynthei kiba la kha hapdeng u snem 2008 bad 2015. Te kumta la kyntu ïa ki khynnah ïalehkai kiba kwah ban ïashim bynta bad ïakhun na ka bynta ka lad ban kiew shaphrang ha ka Tyger-India Khelo Football.
Ka India Khelo Football (IKF) ka pynlong ïa ki jingpyrshang (trial) ha ki nongbah bapher bapher ha kylleng ka ri India da ka jingthmu ban wad ïa ki sap ba kyrpang. Ki khynnah ba la shah jied na ki nongbah kin sa shah bishar bniah bad ki lah ban rung sha ka Pre-Final bad nangta sha ka National Final. Ha ka National Final ka IKF ka khot ïa ki nongjied na kylleng ka pyrthei (khamtam na ki club jong ka ISL & I-League) ban jied ïa ki khynnah kiba la dep wad sap ïalehkai da ka IKF lyngba ka Pan India Trials.
