Shillong, Ïaïong 10
Ka Paris Saint-Germain (PSG) ka la jop ha ka quarter final wat ba nyngkong jong ka Champions League hadien ba ka la pynliem ïa ka Aston Villa da 3-1 ha la ïing ha Parc des Princes stadium.
Hadien ka jingjop ïa ka Liverpool ha ka pre-quarter final, kane ka kynhun jong u Luis Enrique mynta ka la don jingkyrmen ban jam sha ka semi final ha ki ar snem kynthih.
Ha kawei pat ka liang, ka Villa ka la ïakynduh jingeh ban jam sha ka semi final ha ka sien kaba nyngkong naduh ba la jop teng ha u snem 1982 namar ba ka donkam ban ïakhun tyngeh ha ka wat ba ar ka ban long ha la ïing ha ka 16 tarik mynta u bnai.
Ha kane ka jingïakhun, u Morgan Rogers u la pynkhih jar nyngkong eh na ka bynta ka Villa ha ka minit kaba 35, hynrei tang hadien saw minit ka PSG ka la pynïakhaid kylla lyngba u Desire Doue.
Ka PSG ka la pynbud biang ïa ka kol ba ar ha ka kylla miet lyngba u Khvicha Kvaratskhelia ha ka minit kaba 49 bad shwa ban wai ka la thep biang ïa ka kol kaba khatduh lyngba u Nuno Mendes (90+2) bad pynlong ban jop shisyndon.
Haba phai sha kawei pat ka jingïakhun, ka Barcelona ka la don jingkyrmen ban jam sha ka semi final hadien ba ka la lah ban pynliem ïa ka Borussia Dortmund haduh 4-0 kol ha la ïing bad u Robert Lewandowski u la thep ar kol.
Kane ka kynhun kaba la rah san sien ïa ka nam lahduh, ka la pynkhih jar nyngkong eh lyngba u Raphinha ha ka minit kaba 25. Nangta ka la thep lai kol ha ka kylla miet lyngba u Lewandowski ha ka minit kaba 48 & 66 shwa ba u Lamine Yamal (77) un thep ïa ka kol kaba khatduh na ka bynta ban pynlong ïa ka Barca ban jop shisyndon.
Kumta, ka Barcelona kaba la jop khatduh ïa ka Champions League ha u 2015, kan leit sha Germany ha ka Sngi Ba-ar na ka bynta ban ïaknieh rung sha ka semi final.
