Nongpoh, Ïaïong 10
Ka jingjia khah-khah jong ki jingïatyngkhuh kali ha ka surokbah National Highway 6, kiba poi ruh bunsien sha ka jingjia ba sngewsih, ka la pynlong ïa ki pulit pynïaid kali ka thanat Nongpoh ban pynjur ïa ka jingkhynra bad talasi ïa ki kali kiba kit palat pud, ki nongñiah ar shaka ki bym phong ïa ka jingda khlieh (helmet) bad khamtam eh ka jingñiah kali buaid nalor kiwei kiwei de ki jingpynkheiñ ïa ki kyndon aiñ ñiah kali.
Ha ka jingkhynra bad talasi ïa ki kali kiba ïaid ba ïeng lyngba ka surok bah National Highway 6, ha ka janmiet jong ka sngi Balang ha Nongpoh kaba la lamkhmat da u Rubul Ali, In-charge ka Traffic Branch Nongpoh lem bad u SI Liamgory Ingty, la lap ïa kiba bun ki kali kit siej kiba kit palat pud kiba ïaid sahuh khamtam ha ki por miet kaba la buh jingma shikatdei ïa kiwei pat ki nongleit nongwan.
Nalor kitei ki kali kit siej, ki pulit ki la ïoh ruh ban bat ïa ki nongñiah kali kiba la shoh khawiang bad ruh ki nongñiah ar shaka kiba khlem phong ïa ki jingda khlieh. Lyngba kane ka jingkhynra bad talasi, ki pulit ki la ïoh ban daiñ kuna haduh T.2.90 lak (ar lak khyndai phew hajar).
Haba kren sha ki lad pathai khubor, u Rubul Ali, In-charge ka Traffic Branch Nongpoh bad u SI Liamgory Ingty, ki la ïathuh ba ka jingñiah hapdeng ka jingbuaid, ka jingbym phong ïa ki jingda khlieh, ka jingsangeh khlemakor jong ki trok hapdeng surok, ka jingkit palat pud, ki dei bunsien ki daw kiba pynlong ïa ka jingïatyngkhuh kali ba khah khah kaba la wanrah ruh ïa ka jingduh jong kiba bun ki mynsiem briew.
Ki la ïathuh ruh wat hadien ba na ka liang ki bor pulit ki la dep ban ai jingpynshai paidbah na ka por sha ka por ïa ki kyndon aiñ ñiah kali, hynrei ki dang don hi kiba leh pyrshah. Ki la ïathuh dang ha kine ki khyndiat por ba la dep, la sam ei haduh 300-400 tylli ki jingda khlieh (helmet) sha ki nongñiah ar shaka bad ruh kito kiba shong hadien, hynrei la sakhi ba ki dang bun ki bym ju phong satia ïa ki jingda khlieh bad kane ka buh jingma khamtam ïa ka jingim ka jong ki hi shimet nalor ka jingpynkheiñ ïa ki kyndon aiñ.
