Shillong, Ïaïong 10
Ar ngut shipara kynthei kiba duna ha ki dkhot met, kata ki bym da ïohsngew bha ki shkor bad ki bym da lait bha ban kren hynrei ki la lait ïa ka matrik ne ka eksam Secondary School Leaving Certificate (SSLC) na ka Clearwater Secondary School Shangpung, West Jaiñtia Hills District kaba la pynbna mynta u snem 2025 bad pynlong da ka Meghalaya Board of School Education (MBoSE).
Napdeng kine ar ngut shipara, kawei kaba dang ïohsngew malu-mala lada leit kren hajan hynrei kawei kam da ïohsngew bha ki shkor. Pynban da ka jingtrei shitom ki nonghikai naduh ba ki wan Nursery ki la hap ban pynshitom ban ai jinghikai ïa ki wat la kim shym la ïoh jinghikai shaphang kumno ban hikai ïa ki briew ki bym ïohsngew hynrei kine ki khynnah ki ithuh ïa ka jinghikai da kaba ïohi ba khih ka shyntur.
Kine ar ngut shipara ki la leit ban pyntbit suhjaiñ noh mynta ba la ai jinghikai da ka District Industries ha Jowai namar naduh por ba ki dang leit skul ruh ki don sap ban suhjaiñ.
Haba u nonglum khubor na Shillong u la hiar sha kane ka skul ha Shangpung ban leit ïakynduh kyrpang ïa kine ar ngut shipara, na ka liang ki bahaïing kim kwah ban pyni dur khmat ne pynmih kyrteng hynrei u nonglum khubor u la ïoh ban shondur na bynta shadien ha ka por ba ki wan ban ai khublei ïa ka Headmistress jong kane ka skul ka Kong Amonmi H Suchiang.
Haba ïoh ban ïakren bad ka Kong Suchiang ka la ïathuh ba mynta u snem, la phah 20 ngut ki khynnah skul ban ïakhun ïa ka eksam SSLC bad baroh ki la pass lut.
Ka la pynpaw ka jingsngewkmen haba ar ngut ki khynnah skul kiba duna dkhot met hynrei ki ruh ki la pass ha kane ka eksam wat la ki nonghikai ki la ai jinghikai ïa ki khlem da ïoh ka jinghikai pyntbit kumba ïoh lem kiwei ki khynnah kiba duna dkhot met.
Ka la ïathuh naduh klas ba nyngkong, ki nonghikai ki la sdang ban ithuh ïa kine ki khynnah ba ki don jingbym ïoh sngew ha ka skhor, kumta ki la trei shitom ban ai jinghikai ïa ki haduh ban da lait ïa ka eksam matrik.
Shuh shuh, ka Kong Suchiang ka la pyntip ba kane ka skul la seng ha u snem 1989 bad mynta u snem kane ka skul ka don haduh 300 ngut ki khynnah skul naduh klas ba dangrit haduh klas-10.
Ka don jingkyrmen ba ha u snem ban wan kane ka skul kan sei ïa ki khynnah kiba lah ban poi sha ka Top-20 kumba la buh da ka MBoSE.
