Shillong, Ïaïong 10
U Lionel Messi u la lah ban thep ar kol ha kaba ka la pynlong ïa ka Inter Miami ban jop da 3-1 kol pyrshah ïa ka Los Angeles FC kumjuh ban tam da 3-2 ha ka aggregate ha ka sngi Palei bad ban jam sha ka semi final jong ka CONCACAF Champions Cup.
Wat lada ka la shah rem da 0-1 kol ha ka wat kaba nyngkong, ka Miami ha kaba nyngkong ka la ïakynduh jingeh hadien ba ka la shah thep kol ha ka minit kaba 9 ha ka LAFC lyngba u Aaron Long.
Hynrei hadien shiteng kynta u Messi u la lah ban pynïakhaid kylla ïa ka Miami hadien ba u la ïoh ban thep kol ha ka minit kaba 35, hynrei kane ka kynhun jong u Javier Mascherano ka dang donkam sa ar tylli ki kol.
Hadien ba la bteng ïa ka jingïakhun jong ka kylla miet ka Miami ka la pynbud biang ïa ka kol kaba ar lyngba u Noah Allen uba la shut shapoh ‘box’ ha kaba ka bol ka la poi sha u Federico Redondo, uba la lah ban pynurlong hadien ba u rangapkol ka Los Angeles, u Hugo Lloris um shym la lah ban pyllait na ka jingshah thep.
Ka Miami ka dang donkam sa kawei pat ka kol ha kaba ka la ïoh biang sa shisien lyngba u Luis Suarez, uba la pyndei da ka khlieh hadien ka jingïarap pynbuh bol da u Messi, hynrei na ka liang u rephri u la rai ba ka dei ka ‘offside’ pyrshah ïa utei u rangïalehkai shakhmat na Uruguay.
Shwa ban wai ka Miami ka la kyrpad ïa u rephri ba u Marlon u la pyndei ïa ka bol da ka kti hapoh ‘box’ bad hadien ba la bishar bniah lyngba ka VAR la lap ba utei u rangïalehkai shadien na Brazil u la pyndei da ka kti ïa ka bol.
Te kumta u Messi um shym la pynlehnohei ïa kane ka kabu ksiar kaba u la thep ïa ka kol kaba ar lyngba ka penalty ha ka minit kaba 84 bad ban pynlong ïa ka Miami ban jam sha ka semi final.
