Shillong, Ïaïong 11
Ka Jylla ka la pynpaw ïa ka jingtbit ha ka Online National Kettlebell Sport Championship kaba la kut dangshen ha Goa da kaba wan ha ka kyrdan ba-ar bad ban khur baroh 13 tylli ki takma.
Kine ki kynthup ïa khyndai tylli ki takma ksiar, lai tylli ki takma rupa, bad kawei ka takma rnong. Kane ka kynhun ïalehkai ka Jylla ka la wan hadien ïa ka Maharashtra, kaba la bat ïa ka kyrdan ba ha khlieh duh, katba ka Uttarakhand ka la wan ba lai.
Ka jingjop ba phylla jong ka Meghalaya ha katei ka jingïakob ka pyni ïa ka jingkiew ha kane ka jingïalehkai.
Ha ka jingïakob jong ka One Arm 10-Minute Clean and Jerk, ki nongïalehkai ka Jylla ki la khur ïa bun tylli ki takma ksiar. U Bah Brian Wallang, Manish Sohbar, Stevenson Naduh, Ian Kupar, bad ka Enifer Nongkynrih ki la khur mar kawei ka takma ksiar ha la ki jong ki kyrdan. Ïa ki takma rupa la khur da ka Cathy Marbaniang, Kathy Decruse, Persara Thangkhiew bad ka Kynjaimon Pdah.
Ha kiwei pat ki jingïakob, ka Sonia Langstieh ka la khur ïa ka takma ksiar ha ka jingïakob 12-Minute Military Snatch, katba u Gagandeep Singh u la khur ïa ka takma ksiar ha ka 10 Minute Snatch.
Kaba pyndap shuh-shuh ïa ka jingjop jong ka jylla, u Sandeep Sharma kum coach u la khur ar tylli ki takma ksiar ha ka jingïakob 10-Minute 24kg Snatch bad 30-Minute 24 kg Snatch. Kane ka jingïalehkai kaba kham kyrpang jong u, ka la pynlong ruh ba un ïoh rung sha ka lympung ïalehkai Kettlebell World Championship ka ban sa long ha Busto Arsizio, Italy naduh ka 5 haduh 8 tarik u Jylliew mynta u snem.
Lah ban kdew ba u Sandeep Sharma mynshwa u la khur ïa ka takma rnong na ka bynta ka India ha ka lympung ïalehkai Kettlebell World Championship ha Hungary ha u snem 2023 bad u la bteng biang ïa ka jingjop ha Poland ha u snem 2024.
