Jowai, Ïaïong 11
Hadien ba saphriang kawei ka ‘Video’ ba shah bret iwei i khyllung ha thliew ba la shah ieh shrah ha u bnai ba la dep lyngba ki rynsan lad pathai, haba wad jingtip halor kane, na ka liang ki pulit ki la pyntip ba haduh mynta ym pat ïohpdiang jingujor na kano-kano ka thanat lait noh ka ‘video’ kaba saphriang lyngba ki rynsan lad pathai.La ïathuh ba ka kmie jong itei i khyllung dei kaba sah shipor ha thaiñ Khliehriat bad ka shnong trai ka dei na Nangbah, West Jaiñtia Hills District.
La ong ba ka don jingpang shitom ha ka bor pyrkhat bad la ïathuh ruh ba kane ka jingjia, ka la jia ha ka 8 tarik Lber, ha kaba katei ka longkmie, ka la bret ïa la i khyllung ba dang kumba 5 bnai eiei ha kawei ka thliew kaba don ha thaiñ Khliehriat ha ka jaka kaba ki khot ka Khloo Chongwar.
Ïa ine i khyllung la ïohi da ki katto-katne ki nongshong shnong ha kajuh ka miet ha ka por kumba 11 baje. Hadien ba ki nongshong shnong ki la lah ban pyllait im ïa ine i khyllung, ki la pynkit noh sha Khliehriat Civil Hospital ban ïoh jingsumar.
Hadien kane, la pynkynriah noh ïa ine i khyllung sha Ïalong Civil Hospital, Jowai bad nangne la rah pat sha NEIGRIHMS ban ïoh ïa ka jingsumar kaba kham paka. Ka jingtohkit kaba kham bniah halor kane ka kam ka dang ïaid.
