Shillong, Ïaïong 11
U Symbud Myntri Rangbah ka Jylla ba khmih ïa ka tnat Pohïing (Police), Bah Prestone Tynsong u la ong ba ka Sorkar kam shym la pynbor satia ïa ki paidbah ba kin pynrung kyrteng Aadhaar, namar mynshwa ki paidbah ki pyrshah jur ïa u Aadhaar katba mynta pat bun ki leit pynrung kyrteng hi dalade. U la ong ba kiba kwah ban ïoh jingmyntoi na ki skim Sorkar ki lah ban leh, ki bym kwah ka shong ha ki.
Haba kyntait ban kynthoh ïa ka jingïakhih ka Awaken India Movement (AIM) pyrshah ïa ka jingpynïasoh Aadhaar, u Bah Prestone u la ong um lah ban ong eiei ïa ki, hynrei lada ki kwah ban ïoh ïa ki jingmyntoi ba la ai da ka Sorkar, la ka dei ba ai ka Sorkar Pdeng ne Sorkar Jylla, ka shong ha ki. “Ngim lah ban pynbor ïa ki ban pynrung kyrteng Aadhaar lada ki sngew ba kam long kaba donkam ïa ki”, u la ong.
Haba pynpaw ba kane ka kam ka dei ka mat kaba la slem bha, u Symbud Myntri Rangbah u la ong ba ki paidbah hi dalade mynta ki la sdang ban leit pynrung kyrteng Aadhaar.
“Ngan ïathuh ïa phi kawei, haba nyngkong ki paidbah ki la pyrshah jur bha ïa ka Aadhaar card, hynrei nga ong ïa phi ba dang khyndiat por mynta ki paidbah dalade ki la leit ban pynrung kyrteng ha ki centre ban ïoh ïa u Aadhaar card”, u la ong.
U Bah Prestone u la ong ba u Aadhaar u long uba donkam namar wat haba leit rung klas ha kino-kino ki jaka pule lane ban ïoh ïa ki marbam rashon, bad ki jingïarap haba pang ba shitom bad kiwei ki skhim jong ka Sorkar.
