Shillong, Ïaïong 11
Namar ka jingdon ka jingshah pynthut bad ka jingshah patrong ha ki bor pulit bad bor majistor ha ka por ba ki la pynlong ïa ka jingïalang paidbah ba jai-jai hajan u mot dur jong u Kiang Nongbah kaba don mar pyrshah bad ka Shillong Civil Hospital ha ka 9 tarik u Ïaïong, 2025, ban pynpaw ïa ka jingpyrshah halor ka jingshah knieh noh ka hok longbriew-manbriew kaba kum ki paidbah ki don na ka jingdon ka jingshah pynbor ban leh ïa ka ‘Aadhaar Card’ bad ka jingdon ka jingshah pynduh ruh ïa ki jingïoh myntoi na ka Sorkar tang namar ba kim don ïa ka ‘Aadhaar Card’, ka Awaken India Movement (AIM) Meghalaya State Committee hapoh ka jingïalam jong u Bah Banshai Marbaniang kum Chairman, ha ka 11 tarik ki la leit ban ai ujor sha ka Meghalaya Human Rights Commission (MHRC) halor kane ka bynta.
Na ka liang u Bah Banshai Marbaniang u la ong ba ha katei ka sngi ba la pynlong ïa ka jingïalang, kiba bun ki paidbah ki la wan mih sha katei ka jingïalang da ka jingsuk bad jingkmen mynsiem bad halor ka jingsngewthuh shai ba ki don ïa ka hok halor ka riti synshar paidbah katkum ka hok longbriew-manbriew hynrei na ka liang ki bor pulit pat ki la wan ban pynthut ïa ka jingïalang paidbah da kaba ki la rah ruh ïa ki dkhot ka kynhun ban thep shapoh ki kali jong ki.
U Bah Banshai u la buh jingkylli halor kaei ka kam sniew ba ka kynhun ka la leh bad ba ki paidbah ki la leh aïu ban pynthut ha katei ka sngi kaba la pynlong ïa ki bor ka aiñ ban wan pynthut ïa ka jingïalang jong u paidbah.
“Kaei ka jingsniew ba na ka liang ka kynhun ka leh? Kaei kaba ki paidbah ki pynthut? Hynrei ha ka jingïalang kaba ngi ïaid ka long beit ha ka ri synshar paidbah bad ha ka ri kaba laitluid”, ong u Bah Banshai.
Shuh-shuh, u Bah Banshai u la ong ba lada ka Sorkar ka dei jong u paidbah ka mut ki dang don ka hok ïa kaei kaba ki don ban kren ne pynpaw hynrei lada ka Sorkar ka dei ka kam shimet jongno-jongno ka mut yn ym don ba lah ban kren bad da kaba kyrpad ruh ïa ka Human Rights Commission ba kan shimkhia halor kane ka jingwan ujor ka kynhun katkum ka longbriew-manbriew ki paidbah.
“Ki paidbah ki long ki nongjied ïa ki nongmihkhmat bad ki nongmihkhmat ki thaw ïa ka Sorkar bad lada ka Sorkar ka dei jong u paidbah, ki paidbah ki dang don ka hok ïa kaei-kaei ban kren hynrei lada ka Sorkar ka dei ka kam shimet jongno-re-jongno ka mut yn ym don ba lah ban kren da lei-lei ruh”, bynrap u Bah Marbaniang.
