Imphal, ïaïong:
Lai ngut ki lehnoh jong ka kynhun Maoist ryngkat bad ka pistol kaba don kuli ha ka por ba la don ka jingpyntreikam jong ka kynhun ki pulit ka Manipur bad ki shipai ka sorkar pdeng ha ka sngi Balang, la ïong ka khubor jong ki heh pulit ha ka sngi Palei.
Ki pulit ki la ïoh ban kurup ïa ka pistol 9mm ha ryngkat ki kuli ba don uwei u Magazine bad saw tylli ki kuli 9mm na ka ïing jong uwei u briew ba la tip kyrteng kum u Kongkham Binoy Singh (42) uba shong ba sah ha Mayang Imphal Maibam Konjil Mayai Leikai kaba hap hapoh ka Mayang Imphal-PS ha Imphal West distrik.
Utei u briew uba la shah kem u dei u dkhot jong ka seng kaba la shah ñiew beaiñ jong ka Kangleipak Communist Party – People’s War Group (KCP-PWG).
Kane ka jingkem bad kurup ka long katkum ka jingkwah jong u nongshah kem u Maibam Nanao Singh @ Kokngang @ Bungo (49) na Loitang Khullen Maning Leikai uba hap hapoh ka Sekmai-PS, Imphal West District, uba dei u dkhot jong ka KCP(PWG).
Na ka jingkren jong ki shuh shuh, ki pulit ki la kem biang ïa uwei u dkhot jong ka seng KCP(PWG), u dei u Lourembam Krishnamohon @ Punshiba (45) na Mayanglangjing Tamang, Imphal West.
Ïa une u briew la kem na Lamsang Bazar hapoh ka Lamsang-PS, Imphal West District. U donkti ha ki kam dawa pisa da kaba shakri ïa ki jingdawa pisa/jingbyrngem ïa ki heh sorkar hapoh bad sawdong ka thaiñ Imphal. Na ka kti jong u la kurup kawei ka Mobile Handset bad kawei ka Aadhaar Card.
