Shillong, Ïaïong 11
Ki ar tylli Autonomous District Council ba kynthup ïa ka KHADC bad JHADC haduh mynta kim pat shym la phah satia sha ka Sorkar ïa ka kyrteng ba ki tyrwa na ka bynta ki MDC shu sieh (Nominated).
Haba pyntip ïa kane, u Symbud Myntri Rangbah ba khmih ïa ka tnat District Council Affairs (DCA), Bah Prestone Tynsong u la ong ba haduh mynta ka Sorkar kam pat ïoh satia ïa kano-kano ka jingtyrwa kyrteng na ka bynta ki MDC shu sieh ha KHADC bad JHADC.
Kham ha shwa ka la mih ha ki lad pathai khubor ba ka Sorkar Jylla ka lah ban ym pdiang ïa ka jingtyrwa jong ka executive committee ka KHADC ha kaba ïadei bad ka jingpyndap ïa kawei ka shuki MDC kaba dei da kiba khlem shah jied.
“Ngam lah ban ong kumno-kumno ruh ïa mynta ngin ieh shwa haduh ba ngin da ïoh ïa ka jingtyrwa na baroh ar tylli ki executive committee bad ngin sa shim ïa ka rai,” la ong u Bah Prestone ha ka sngi Palei.
Haba kylli, u Symbud Myntri Rangbah u la ong ba katkum ka AD Rules ka jingtyrwa ka dei ban wan beit na ki executive committee ïa kaba yn ai jingmynjur pat da ka Sorkar Jylla.
“Ka dei ka jingshisha, lada ngi bud beit na ka AD Rules ka jingtyrwa ka dei ban long beit na ki executive committee jong ki district council”, u la ong.
