Kolkata, Ïaïong 11
Ka Mohun Bagan Super Giant (MBSG) kan ïakhun pyrshah ïa ka Bengaluru FC ha ka jingïakhun phainal jong ka Indian Super League (ISL) 2024-25 ha ka madan ïalehkai Vivekananda Yuba Bharati Krirangan (VYBK) ha ka 12 tarik u Ïaïong, ha ka por 7:30 janmiet (IST).
U Jose Molina, Head Coach ka Mohun Bagan Super Giant, haba kren ha ka jingïalang bad ki nongthoh khubor shwa ka jingïalehkai phainal, u la ban jur halor ka jingdonkam ban peit sha khmat bad ban ym khuslai ïa kiei-kiei kiba la dep. “Ngam sngewkhia ïa kaei kaba la jia ha ki por ba la dep. Nga pyrshang ban leh ïa kaba bha tam na ka bynta ka Mohun Bagan Super Giant. Ngi la leh bha ban jop ïa ka League Shield bad ngi don ka jingangnud ruh ban jop ïa ka ISL Cup.
Katba, na ka liang u coach ka Bengaluru FC u Gerard Zaragoza u la pynpaw “Ngi don ka jingangnud kaba khraw na ka bynta ka phainal bad ngi sngewkmen bha na ka bynta ka jingïalehkai. Baroh ki long kiba biang. Ngi sngewskhem bad ka Kolkata ka la jan long kum ka ïing kaba ar jong ngi, namar ngi la don hangne na ka bynta ka Durand Cup. Ngi la ïoh ïa ka playoff kaba bha bad ngi khmih lynti ïa ka grand finale.”
Ka MBSG ka dei ka nongjop ïa ka League Shield, katba ka Bengaluru FC ka la wan ha ka kyrdan kaba lai ha ka thup bad nangta ka la ïaid lait ïa ki jingeh kiba la ïakynduh ha khmat jong ka ha ka jingïakhun ban shah jied bad shah weng bad kaba la jop ha ka semi final ban poi sha ka jingïakhun ba ha khlieh duh.
Ka dei ka sien kaba saw na ka bynta ka BFC ban mih madan ha ka ISL finals tang ha ki phra samoi, katba ka MBSG ka la long ka kynhun kaba nyngkong eh ban poi sha kane ka kyrdan lai sien lynter. Kane ka jingïakhun ka dei ka jingpynkylla ïa ka jingïalehkai jong ka ISL 2022-23, ha kaba kine ki arliang mamla ki la ïakhun ha ka jingïalehkai ba khatduh jong ka samoi, ha kaba ka kynhun kaba don ha Kolkata ka la mih da ka jingjop lyngba ki penalty ha ka jingïakhun kaba jur bha.
Ki don ka lad ban pynbud biang ïa kata ka jingjop ha khmat ki paidbah ha la ïing kiba shongshit ha kane ka kynti, katba ka Bengaluru FC kan shim ïa ka jingshaniah na ka rukom ïalehkai ba dang shen ban pynkheiñ ïa ka rekod jong ka MBSG kaba khlem shah rem ha la ïing haduh mynta ha kane ka samoi kaba mynta.
Ïa ka phainal jong ka Indian Super League yn pyni ‘live stream’ lyngba ka JioHotstar (English, Hindi, Bengali, bad Malayalam) bad ruh ha ka ‘Star Sports – 3’ (English, Hindi, Bengali, bad Malayalam) bad ha ka Asianet Plus (Malayalam).
