Jowai, Ïaïong 13
Ka Hynñiewtrep Border Dispute Redressal Forum (HBDRF) lyngba u Chairman Chandame Sungoh ka la ong ba ka 13 tarik Ïaïong (April) ka dei ka sngi sngewsih ïa ki paid Khasi Pnar kiba shong basah ha Raid Nangtung kaba tip mynta kum ka Block-II bad ka Elaka Labang Nangphyllut kaba tip mynta kum ka Block I.
Ka Forum ka pynkynmaw ba dei ha kane ka sngi ha ka snem 1951 ba ka Sorkar Assam ka la khlad jubor ïa ka Raid Nangtung bad ïa ka Elaka Labang Nangphyllut na ka Ri Jaiñtia na ka Jowai Civil Sub-division bad pynïasoh jubor ïa ka sha ka United Cachar Mikirs & Hills, Karbi Anglong Autonomous Council mynta lyngba ka Assam Government Notification No. TAD/ R/ 31/ 50/ 149 ha ka por ba thaw ïa ki District Council.
Ïa kane ka kam la leh donbor da ka Sorkar Assam khlem ka jingtip lane jingmynjur jong ki paid Khasi Pnar jong kane ka thaiñ kiba dei ki trai shnong jong kane ka jaka bad kumta ka Forum ha ryngkat ki paid nongshong shnong jong kane ka thaiñ ki ñiew ïa kane ka sngi kum ka sngi ka jingsngewsih bad ki pyrshah jur ïa ka jingleh donbor jong ka Sorkar Assam kaba long ka jingïuh roit ïa ka hok longbriew manbriew jong ki bad ki dang ïai dawa ban wanrah lane pynïasoh biang ïa kane ka jaka sha ka ri ki kpa tymmen jong ki sha Meghalaya, la ong ka Forum.
Ki khmih lynti ba ha kane ka jingthmu jong ka Sorkar Meghalaya bad Assam ban pynbeit ïa u pud u sam, ki nongshong shnong jong kane ka thaiñ kin ïoh noh ïa ka hok jong ki bad ïa kane ka jaka yn pynïasoh pura noh sha ki bynta pdeng jong ka Ri Khasi Jaiñtia kumba ju long naduh hyndai-hynthai kulong-kumah, la ong shuh shuh ka Forum.
