Shillong, Ïaïong 13
U Bah Process T Sawkmie, MLA barim u la pynpaw ba ka jingpass bha jong ki samla ha ka eksamin Secondary School Leaving Certificate (SSLC) ne ka matrik mynta u snem ka paw ba ka jylla Meghalaya ka la kiew ha ka jingpule bad kan sa ïahap kyrdan ruh ha ki jingpule bad kiwei ki jylla hapoh ka ri India.
“Ka jingpass bha ki samla ha ka eksamin SSLC ne Matrik mynta u snem, ka paw ba ka jylla Meghalaya jong ngi ka la kiew bad kan sa ïahap kyrdan ha ka jingpule bad kiwei ki jylla hapoh ka ri India,” ong u Bah PT Sawkmie haba kren sha u nongthoh khubor.
U la bynrap, “Kane baroh ka dei ka jingtrei shitom ki nonghikai, ki khynnah skul, ka jingshimkhia ki kmie ki kpa bad khamtam ka jingïohi jngai jong u Myntri Rangbah ka jylla u Conrad Sangma uba la pyllait paidbah ïa ka Chief Minister Guide Book, kaba la long ka jingmyntoi kaba khraw na ka bynta ki samla pule.”
U ong ruh ba ki paidbah ka jylla ki kwah ban ïohi ba nangne shakhmat ba ka ‘Literacy rate’ ne ka jingkiew ha ka liang ka jingstad ha ka jylla kan long shispah percent.
