Shillong, Ïaïong 13
Ka jinglah ban ïalehkai bha ka la pynlong ïa ka Meghalaya ban pynliem noh ïa ka Sikkim da kaba pynsah sa ar wiket ha kti bad lai bol ha ka jingïakhun phainal jong ka 2nd NECDC Senior Women Tournament 2025 ha ka sngi Saitjaiñ bad ban long ka kynhun kaba khlem shah rem ha kane ka lympung.
Da kaba beh ïa ka Sikkim kaba la ïoh 114 run bad shah pynhap 4 wiket, ka Meghalaya ka la lah ban kynjoh sha ka thong da kaba ïoh 115 run bad shah pynhap 8 wiket ha ki 19.3 over ryngkat ka jinglah ban pynjop da ka Riticia Nongbet.
Ka Sikkim Cricket Association ka la long ka nongpynïaid ïa kane ka lympung bad pynlong pat da ka North East Cricket Development Council (NECDC) kum shi bynta ban kyntiew ïa kane ka jingïalehkai hapoh ka thaiñ shatei lammihngi. Ka Sikkim bad ka Nagaland ki dei kiba la long ki lahduh (joint champion) ha ka sien kaba nyngkong kaba la long mynshem snem ha Ri-Bhoi, na ka daw ka jingshah pynthut ha ki bor ka mariang.
Ka Sikkim sa shisien ka la pynshisha ba ka dei ka kynhun kaba khlaiñ bor namar ka la jop ïa baroh ar tylli ki jingïakhun ha ka Group-B pyrshah ïa ka Arunachal Pradesh bad ka Manipur shwa ba kan pynliem ïa ka Nagaland ha ka semi-final. Ka Meghalaya pat kaba la rung sha ka semi-final ha u snem 2024, ka la jop ha baroh ar tylli ki jingïalehkai ha ka Group-A pyrshah ïa ka Mizoram bad ka Nagaland shwa ba kan ïakynduh ïa ka Manipur ha ka semi final ha ka sngi Thohdieng.
Ka Meghalaya ka la shaniah tylli ha ka Debasmita Dutta, kaba la lah ban ialehai bha, bad ka nongap wiket ka Monica L Phawa. Ka Debasmita ka la ïoh 35 run na ki 41 bol kynthup ïa saw tylli ki ‘four’, katba ka Monica ka la ïoh 37 run na ki 28 bol, kaba kynthup ïa lai ki ‘four’ lem bad kawei ka ‘six’.
Hadien ka jingshah pynhap wiket ha ki 18 over, ka Meghalaya ka donkam sa 11 run ban jop ha ki 2 over bad ha kaba kut ka la lah ban kynjop sha ka thong.
Kham mynshwa, ka Sikkim ka la sdang suki bha hynrei ka la lah ban bynrap run shuh shuh lyngba ka jingïalehkai bha ka Pretika Chettri (29 run na ki 20 bol) bad ka Priyanka Kurmi (43 run na ki 27 bol). Katba ki nongkawang bol ka Meghalaya kiba la lah ban pynhap wiket ki long ka Debasmita (1/24 na ki 4 over) bad ka Monica Singh (1/26 na ki 4 over).
Ka Monica L. Phawa ka la ïoh-pdiang ïa ka nam Player of the Final bad ka Primula ka la ïohpdiang ïa ka nam Player of the Tournament bad Top Wicket-taker. Ka Samayita Roy Prodhan jong ka Sikkim ka la ïoh ïa ka nam Top Scorer.
Ha kane ka jingïalehkai phainal la ïadon lang u Secretary ka Meghalaya Cricket Association, Bah Rayonald Kharkamni uba la wan ban ai jingkyrshan ïa ka kynhun ki ‘thei ïalehkai ka Jylla.
Na ka liang u President ka MCA Naba Bhattacharjee bad uba dei ruh u nongseng bad Co-Convenor jong ka NECDC u la pynpaw ka jingsngewkmen halor katei ka jingjop ha Sikkim. “Ka dei ka por lehkmen ïa ka kriket jong ki kynthei ka jylla Meghalaya. Khublei ïa ka kynhun ba la kham rangbah jong ngi kaba la jop ïa ka lympung ïalehkai ba ar jong ka NECDC Inter State Tournament da kaba pynliem ïa ka Sikkim ha ka phainal. Kane ka di lyngba ka jinglah ban pynpaw ïa ka jinglong ba shisha, ka jingtreilang bad ka jingaiti lut – khlem da shah rem wat tang shisien ruh. Kane ka long kum ka jingai mynsiem, nga sngew sarong haduh katta katta ïa ki khynnah kynthei, ki nongkyrshan baroh kawei bad kiba ieit ïa kane ka jingïalehkai kriket bad to ngin leh kmen halor kane ka jingjop.”
