Shillong, Ïaïong 13
Ha ka jingsngewlehraiñ kaba khraw ïa ka ri India hi baroh kawei, uwei u nongïalehkai ba paw u la shah ‘test positive’ halor ka jingpyndonkam ïa ki dawai kiba la mana pyrshah, ha ka por ka jingleit shim bynta shabar ri.
U Kartik Kumar, uba la khur ïa ka takma rupa ha ka Asian Games 2023 ha Hangzhou, ula shah test positive ha ka por ba u dangleit pyntbit bad ban ïakhun ha Colorado Springs kaba ha USA. Kane ka jinglap ka dei lyngba ka jingpynlong da ka United State Anti-Doping Agency (USADA). Te kumta u la shah sospon shi syndon ïa katei ka lympung.
Na ka liang ki heh jong ka Athletic Federation of India (AFI) ki la pynthikna ïa kane ka jingjia bad ki la ïathuh ruh ba kin sa leh ïa kaba donkam. U Kartik u la lah ban khur ia ka rekod halor ka jinglah ban pynpaw ïa ka jingtbit ha ka 10,000m ha ka Asian Games ha u snem 2023 ha kaba u la lah ban pyndep ha ki 28:15.38 sekhon. Hynrei, u la lah ban leh kham bha ïa kata ka jingkheiñ ha ka por ba ïakhun ha JSerra Catholic HS, San Juan Capistrano, CA (USA) ha u snem ba la dep, ha kaba u la lah ban pyndep ha ki 28.01.90 sekhon. U la mareh ha kane kajuh ka lympung mynta u snem ha ka 29 tarik u Lber ha kaba u la wan ha ka kyrdan kaba phra da kaba pyndep ha ki 28.11.34 sekhon.
Ha ka 5000m ruh, u la nanglah ban pynbha shuh shuh ha kine ki ar snem ba la dep. Sa shisien pat ha kawei ka jingïakob ha Drake Stadium, Los Ange -les, u la lah ban pyndep ha ki 13:37.64 sekhon. Kaba sngewtynnad ka long ba baroh ki jingïakop kiba u la lah ban ïalehkai bha ki long ha US.
Hynrei kaba sngewsih ka long ba utei u nongïalehkai kiba la shah test positive halor ka jingpyndonkam va u dawai (steroid) ba la mana pyrshah. Ka tyllong khubor na ka AFI ka la ong ba ka lah ban long ba une u nongïalehkai u la pyndonkam ïa utei u dawai na India namar ba kum kine ki dawai kumba ka paw kim don ha ki jaka die jingdie ha US. Ka tyllong khubor na ka AFI ka la kdew ba ki shipai, ki nongpyntrei jong u, bad ki coach kiba u hikai hapoh jong ki ha India ki dei ban kitkhlieh. U ruh um dei u dkhot jong ka kynhun TOPS.
Ka AFI ka la pynbna ba ha u snem ba la lah ki la pynshitom ïa ki coach ruh kumjuh. Kaba sngewtynnad ka long ba ki nongmareh ki la shah hikai hapoh u coach nabar ri bad u coach na India. Ka AFI ka la pynkylla ïa ka jaka sah jong ki bad kawei na ki jingeh kaba kongsan ka long ban buddien ïa ki nongïalehkai na ka bynta ban lap ïa ka jingpyndonkam ïa ki drok. Ka AFI ka thmu wat ban rah ia kane ka kam sha ki shipai.
U Kartik u la don ha US ryngkat bad u Gur-veer Singh lem bad khyndiat ngut kiwei pat ki nongïalehkai. U Gurveer u la thaw ïa ki rekod jong ka ri ha ki por ba ïalehkai ha kane ka samoi. Ka la dei ka por ba ka Sports Authority of India kan bishar bniah halor kane ka bynta.
