Shillong, Ïaïong 14
U MLA ka Voice of the People Party (VPP) na Mawryngkneng, Bah Heavingstone Kharpran ha ka Lah Sngi U Blei u la kyntu ïa ka Sorkar Jylla ban pynlong da ka jingtohkit bniah halor ka jingkhlad noh u pulit Home Guard uba la tip kyrteng da u Bah Ribokson Dkhar Sawian ha Assam, ha ka 9 tarik mynta u bnai.
“Ka long kaei-kaei kaba sngewsih ban ïoh jingtip halor ka jingjia ïa u Bah Ribok na ka shnong Mawryngkneng uba trei ha ka tnad Home Guards & Civil Defence ha ka jingleit shah hikai sha nongbah Guwahati,” ong u Bah Kharpran.
Na ka liang u MLA, u la ong ruh ba kumba paw ha ki lad pathai khubor bad kiwei-kiwei ki tyllong khubor, la sngewthuh ba katei ka jingjia ka dei ka jingshah pynïap.
Haba pynsngew ba ka long kaei-kaei ka bym lah ban pdiang, u Bah Kharpran u la ïathuh ba u la ïakren bad u SP, uba la batai ba la pynngat mukotduma bad leh ruh ïa ka ‘Post Mortem’.
“Ngi ngeit ba ka Sorkar kan shimkhia ïa kane – ban don da ka jingtohkit kaba bniah, ban ïoh ban pynshitom ïa ki ‘riew bymman kiba la shim noh ïa ka jingim jong u Bah Ribok,” u la ong da kaba bynrap, “Ngi ngeit skhem ban ïoh jingtip halor ki briew kiba la leh ïa kane ka kam ha kaba ki la shim noh ïa ka jingim u Bah Ribok.”
U la kyntu ruh ïa ka Sorkar ba kam dei ban shong kli-kti bad ban ym ai ïa kano-kano ka jingtip kaba bakla hynrei ka dei ban long katkum ki jingshem kumba la jia.
“Dei ban lap ïa kiba donkti da kano-kano ka lad ka lynti jong ka aiñ. Ym dei ban ai lad ïa kiba kum kine ki jait kam ban jia barabor khamtam ïa ki paradoh-parasnam kiba leit trei shabar ka Jylla,” ong une u nongmihkhmat.
Ha kawei ka liang, u la phah ka khubor sngewlem sha ka ïing ka sem jong une u samla rangbah, khamtam sha i kurim bad ki khun ki kti bad u ngeit skhem ba u Blei un syrpai syrpud ïa ka ïing ka sem ha kum kane ka jingjia ka bym poi pyrkhat bad kaba sngewsih kthang.
Hashuwa, ka Sorkar Jylla ka la wad jingtip halor ka jingïap jong une u pulit Home Guard uba dang leit pyntbit ha ka jaka ai jinghikai ka NDRF kaba don ha Guwahati, Assam.
Katkum ka jingpyntip sha ka Sorkar Jylla la ïathuh ba utei u pulit Home Guard – Bah Ribokson Dkhar Sawian (34 snem ka rta), la suba ba u la khlad namar ka jingsangeh tied kynsan u klongsnam (Heart Attack) ha ka janmiet jong ka 9 tarik Ïaïong.
Katkum ka khubor ba la ïoh, la ïathuh ba ha ka 9 tarik ki pulit ka Changsari ki la lap ïa ka met jong u Bah Ribok na Amingoan, North Assam ha ka por kumba 9 baje eiei mynmiet.
La ïathuh ba ha ka por mynstep jong ka 10 tarik ki paralok ba leit pyntbit lang bad u Bah Ribok ki la leit ban wad ïa u ha ki jaka ba marjan, hynrei hadien ba kim lap dien eiei, ki la leit ban ujor noh da ka ejahar ha Changsari Police Station, bad haba pyni ïa ka dur, ki la ïoh jingtip na ki pulit ba la ïoh tam ïa ka met jong u Bah Ribok ha ka miet 9 tarik.
Na ka liang u Symbud Myntri Rangbah ka Jylla ba khmih ïa ka tnad Pohïing, Bah Prestone Tynsong u la ong ba katkum ka jingpyntip ki pulit, u Bah Ribok u la mih kai na ka jaka sah ha ka por janmiet jong ka 9 tarik, bad lehse ka lap kynsan ka jingshitom sangeh tied u klongsnam kaba la pynlong ïa u ban khlad syndet ha ka jaka ba u kyllon.
U la pyntip ruh ba ïa ka ‘Post Mortem’ la dep ban leh ban pyntikna ïa ka daw kaba pynlong ïa u Bah Ribok ba un khlad.
“Ngim lah ïa mynta ban ong ba ka dei ka jingshah pynïap, namar katkum ka jingtip ba ngi ïoh haduh mynta ka sngi ka dei beit na ka jingshitom kynsan. Wat la katta, ha kine ki khyndiat sngi ban wan ngin sa lah ban pynshisha ïa ka daw baroh hadien ba la ïoh ïa ka kaiphod ‘Post Mortem’ kaba la leh ha Guwahati”, la ong u Bah Prestone.
