Shillong, Ïaïong 14
Ka Hynñiewtrep National Youth Front (HNYF) Nongthymmai Circle ha ryngkat ka jingïatreilang bad ka HNYF East Khasi Hills bad lyngba ka jingpyntip ïa ki khlieh nongsynshar shnong ka Madanrting bad ka Khasi Hills Autonomous District Council (KHADC), ha ka 14 tarik mynta u bnai, ka la leit ban khynra kyndit kynsan ïa ki kot-ki sla jong ki dukan kiba don ha kylleng ka thaiñ Madanrting ter-ter shaduh Mawblei naduh ka por mynstep haduh ka por janmiet.
Ha kane ka jingleit khynra, ka seng ka la lap ba ki don bun tylli ki dukan ki bym don satia ïa ka Labour License bad ka Trading License kaba biang bad ym tang katta, kaba sngewsih ka long ruh ba katba ka seng ka dang pynlong ïa ka jingkhynra ha kitei ki thaiñ, ka don ka stieh kaba ïada ïa ki bar jylla ha kaba kiba shong ha ka shuki bad kiba pyntrei ki dei ki bar jylla hynrei ka kyrteng pat ka dei ha ka kyrteng jong ki Khasi lane kata ka jingdon ka jingleh ‘benami’.
Halor kine kiei-kiei baroh, na ka liang ka seng kala maham da kaba tyngeh ïa kitei ki bar jylla ba ki dei ban pynbiang ïa ki kot-ki sla ba donkam hapoh ka shi taïew lym kumta na ka liang ka seng kan sa leit ban khang shisyndon ïa ki dukan jong ki lem ka jingleit ban ujor sha ka Council.
Shuh-shuh, na ka liang ka seng ka la pan ruh ïa ka jingpynshai halor kane ka jingdon ka jingleh ‘benami’ na kitei ki trai dukan.
U Bah Orester Mawlong uba dei u dkhot ka seng, u la ong ba ka seng kan aipor tang shitaïew ïa kitei ki bar jylla ba ki dei ban pynbit-pynbiang ïa ki kot-ki sla ba donkam lym kumta kan sa shim noh da ka sienjam kaba tyngeh da kaba khang khyrdep noh shisyndon ïa kitei ki dukan.
U la ong ba ka jingdon ka jingleh ‘benami’ ka dei namar ka jingailad bad ka jingleh hi jong u Khasi ban pynïaid ïa ka khaïi-ka pateng ha ka kyrteng jong ki katba ïa ka kam pat la bat hi da u bar jylla.
“Kaei kaba ngi sngewkhia, ka dei ba ki Khasi jong ngi hi ki ailad ban pynïaid ha kyrteng jong ki katba ka kam pat, u leh u bar jylla bad kata ka dei kaba kum ka seng kam sngewtynnad bad kam pdiang hi ruh”, ong u Bah Orester.
U la ong ba ka seng kan nym shong kli-kti satia halor kane ka bynta da kaba bynrap ba ki jaka baroh kiba hap hapoh ka jingpeit-jingkhmih, ka seng kan ïai khynra beit na ka por sha ka por namar kim kwah ba ïa ka Ri-Khasi yn wan ban tyllep noh da ki mynder ri kiba la leh katba mon lyngba ka jingwan khaïi bad ka jingwan buhai shnong shapoh kane ka Jylla.
Haba kylli, u Bah Orester u la ong na ka liang ka seng kan sa hap ban buddien shwa halor kane bad ban leit ban ïakren bad u CEM bathymmai ka KHADC.
Shuh-shuh, u la ong ruh ba kito ki Khasi kiba ju mlien ban leh ‘benami’, kim dei satia ban dang ïai mlien ban leh ïa kum kine ki jait kam bad ong ba lada ka seng ka lap ïa kum kita ki briew, kan leh da kaba tyngeh ïa ki ruh katkum ka aiñ. “Kano-kano ka kam ki dei ban long trai bad ban trei hi da u Khasi namar babun napdeng ki Khasi jong ngi, ki la lah ban trei ïa kano-kano ka kam ruh bad ngi ai ruh ka khubor ba tyngeh ïa kine kiba leh ‘benami’ ba lada ngi lap, ngin nym pyllait ïa kane hynrei ngin ïaid beit sha ka aiñ”, bynrap u Bah Orester. U Bah A Kharkongor, Vice President ka HNYF Nongthymmai Circle, u la ong ba kito ki ingkhong shyllang mat kiba ju mlien ban ai ïa ki kam-ki jam sha ki bar jylla, kim dei shuh ban dang ïai mlien nangne shakhmat ban leh kumne bad ong ruh ba kum ki bor ba dei khmih bad ki trai jong ka jaka bala buh ïa ka ‘Call Centre’ ha Mawblei, ki dei ban da tohkit bha haba ïadei bad katei ka ‘Call Centre’ namar katei ka ‘Call Centre’ ka dei kaba ju treikam bha tang ha ki por mynmiet-mynïong bad kane ka pynlyngngoh shikatdei eh ïa kiba bun balang halor ka rukom treikam kane ka ‘Call centre’.
