Shillong, Ïaïong 14
U MP ka Lok Sabha na Tura Parliamentary constituency, Saleng A Sangma u la ong ba ka jingshah thombor ki Khristan ka jia man la ka por ha kylleng ka ri.
U la ong ba ka Jylla Manipur ka dei kaba bun tam ki jingjia shah thang ki ïingmane Khristan bad haduh mynta ka jingshah thombor ka dang ïai bteng.
“Ha ki khyndiat bnai ba la dep jong mynta u snem haduh 196 ngut ki Khristan ki la shah thombor, kynthup naduh u Kyllalyngkot haduh u Ïaïong. Kane ka dei katkum ka jingpynmih ha ki lad pathai khubor,” la ong u Saleng haba kren bad ki lad pathai khubor ha ka Lah Sngi U Blei.
U la ong shuh shuh ba ha u snem 2024 palat 800 ngut ki Khristan ba shah thombor, 2023 palat 700 ngut bad ter-ter ka jingshah thombor ki Khristan ka ïai jia man la ka por.
“Kine ki dei kiei-kiei kiba ngi hap ban peit bniah bad shim khia bha,” u la ong. U la ong ba ka ri India ka dei kaba itynnat bha, hynrei mynta ka BJP ka jingpyrshang ban pynjot pynpra ïa ka.
“Kumba ka long mynta ki (BJP) pyrshang ban pynjot pynpra ïa ka ri kaba don bun jait ki jaidbynriew. Ngi hap ban ïeng pyrshah lang bad ngim dei ban ailad kum kine ki jingleh. Kane ka BJP ka la pynjot ïa ka ri baroh kawei,” la ong u MP ka Congress na kane ka Jylla.
