Beijing, Iaiong:
ka China ha ka Sngi U Blei, ka la kyntu ia ka US ba kan weng noh ia ka jingpynjari khajna pyrshah ka jingkhaii ia ki mar na China sha United States, haba iadei bad ki tiar ilektrik ba la pynmih da ka China.
U nongialam ka China, Xi Jinping, u la ong ba ka China ha kane ka por kan ailad ia ka US ba kan pynbeit ia ki rai kiba ka la kum shim bakla ha kine ki taïew ba la leit bad u la ong ba ka China ka kyrmen ba ka US kan ïaid noh ha ka lynti kaba dei bad ba kan ym rai kyrkieh shuh halor kiei-kiei baroh.
Katkum ka jingthoh ba la phah da ka US Customs & Border Protection, la ong ba ia ki tiar ilektrik jong ka China kum ki mobile phone, ki laptop, ki memory chip lane ki ‘memory card’ bad kiwei-kiwei de ki tiar ba la shna bad pynmih da ka China bad kiba ju ïaid iew bha kylleng ka pyrthei.
Kane ka jingkren jong ka China ka long ruh hadien ba ka China, ka la pynjari khajna kylla ia ka US halor ki mar khaii jong ka US, ha kaba ka China ka la buh khajna haduh 125% ia ki mar khaii jong ka US ki ban leit pynpoi sha China kum shi bynta ban pynphai kylliang ia ka jingbuh khajna heh jong ka US ia ki mar ba pynpoi na China.
Namar la ong ba bun na ki mar khaii jong ka China kin ngat ha katei ka 145% ka khajna ba la buh da ka US, hadien ba ka US ka la weng noh shipor ia ka jingbuh khajna ia ki ri jong ka pyrthei, hynrei katei ka khajna jong ka US kan treikam tang ia ka China.
Dei kane ka daw, kaba la pynbitar ia ka China bad kaba la pynlong ia ka China ba kan buh khajna kylla ia ka US haduh 125% ia ki mar khaii jong ka US ki ban shalan sha China.
