Shillong, Ïaïong 14
U Symbud Myntri Rangbah ba khmih ïa ka tnat Pynroi Sor, Bah Sniawbhalang Dhar u la kam ba ki projek ba la pyntrei na ka bynta ka Smart City ki la ïaid shaid-shaid.
Haba kren ha ka Lah Sngi U Blei, u la ong ba ki kam baroh ki la ïaid bha bad ka tnat ka dang bishar bniah ruh ïa baroh ki projek na ka por sha ka por.
Ha kaba ïadei bad ka ïew kaba la shna ha Polo, u la pyntip ba haduh 98 percent na ki jingpyntrei ïa ka Polo Shopping Complex ka la dep, bad bynrap ba ka jingpyntrei ïa ka jaka ban ïeng ki kali ruh ka la sdang ïaid shaid-shaid.
“Ngi kyrmen skhem ba lada ym dei mynta u snem 2025, hapoh ki pdeng snem u 2026 ki kam baroh yn sa lah ban pyndep,” u la ong.
Ha kajuh ka por u Symbud Myntri Rangbah u la pyntip ba ka Sorkar kan sa mang pisa shen ban siang rong thymmai noh ïa ki surok baroh ha sor Shillong.
“Ka tnat Public Works Department (PWD) ka la dep aiti ïa ka Detailed Project Report hadien ba ka Sorkar Jylla ka la rai ban pynsangeh noh ka jingshna ïa ka ‘smart road’ jong ka ‘Smart City Project,” u la ong.
U ïathuh ba ïa kane ka projek (smart road) la shem ba kam ïahap satia ban pyntreikam namar kiba bun ki daw.
“Ngi la rai ban pynsangeh noh ïa kane ka projek khnang ba ngin lah wanrah da ki jingtyrwa ba thymmai na ka tnat PWD. Ngin sa mang pisa ïa kane, bad ha une u snem ngin sa ïoh ïa ki surok kiba bha,” la ong u Bah Dhar.
Haba kylli, u Symbud Myntri Rangbah u la pyntip ruh ba ka tnat PWD ka la ithuh lut ïa baroh ki jaka lang um bad ka tnat ka dang pynkhreh ïa ki jingdonkam ban weng noh ïa kane ka jingeh.
