Shillong, Ïaïong 14
Ka Churchill Brothers FC ka la weng noh ïalade na ka Super Cup kum ka jingpyrshah ïa ka jingbym burom jong ka All India Football Federation (AIFF) ïa ki kyndon ha ka por ba pynïakap ïa ki kynhun na ka bynta katei ka lympung.
Ha kane ka Super Cup ki don 16 tylli ki kynhun ban ïashim bynta kiba kynthup na ka Indian Super League (ISL) bad I-League. Kine ki kynthup ïa 13 tylli ki kynhun ïalehkai ISL, katba tang 3 tylli na ka I-League kiba kynthup ïa ka Churchill, Inter Kashi bad ka Gokulam Kerala kiba la pynthikna ban shim bynta.
Te kumta ka Churchill ka la shah pynngat ban ïakhun pyrshah ïa ka lahduh jong ka ISL ka Mohun Bagan Super Giant ha ka 20 tarik mynta u bnai, kaba dei ka sngi sdang jong kane ka lympung ka ban long ha Bhubaneswar.
“Ka jingpynïakap ba la pynïaid da ka AIFF kam long kaba khuid ha ka rukom pynïaid,” la phah jingthoh ka Churchill sha u President ka AIFF u Kalyan Chaubey ha ka Sngi Saitjaiñ. “Ka jingshisha ba ki kynhun bapher bapher ki la shah pynngat ha ki rukom bapher bapher bad ki bym long kiba ïahap.”
Ka Churchill ka la don ka jingïakynad bad ka AIFF halor ka jingkyntait jong ka bor pynïaid ban pynbna paidbah ïa ka kum ka lahduh hadien ba ka la lah ban pyndep ïa ka kyrdan ba ha khlieh duh jong ka I-League ryngkat 40 poiñ. Ka Inter Kashi kaba don ha ka kyrdan ba ar, ka la ïoh 39 poiñ, ka lah ban kiew shakhmat lada jia ba ka rai jong ka appeal committee kam shim ïa ka rai kaba khatduh.
Dei kane ka jingbym lah ban pynbeit kyrdan kaba la mih ïa ka jingïakynad. Ka Churchill ka la ujor nyngkong eh sha u Chaubey halor ki jingbym beit ha kaba pynlong ïa ka jingpynïakap kaba la long ha ka 9 tarik mynta u bnai bad u la weng noh hadien lai sngi hadien ba kam shym la ïoh ka jingpynshai.
Kane ka Super Cup kan sdang ha ka 20 tarik mynta u bnai ha kaba ka lahduh mynshem snem ka East Bengal kan ïakhun pyrshah ïa ka Kerala Blasters ha ka por 4:30 janmiet.
