Shillong, Ïaïong 14
Ka Voice of the People Party (VPP) ka la rai ban ym ïadon bynta ha ka komiti jong baroh ki seng saiñ pyrthei ne ka ‘All Party Committee’ halor ka mat ba ïadei bad la lynti rel kat bym pat biang ki lad jingïada na ka jingwan rung kyrthep shapoh ka Jylla.
“Ka VPP ka sngewsih ban pyntip ba ngin ym ïashim bynta ha katei ka komiti ba la kdew ha kane ka por,” ong u General Secretary ka VPP, uba dei ruh u MP ka Shillong, Dr. Ricky A.J. Syngkon ha ka kyrwoh sha u Chief Secretary ka Jylla.
Wat la ka seng ka la pynpaw ka jingsngewnguh halor ka jingshimkhia ka Sorkar ha ka ban thaw ïa kane ka komiti ban eksamin ïa ka mat halor ka jingpynïasoh lynti rel hapoh ka Jylla, ha kawei ka liang ka la pynsngew ba ha shuwa ba kano-kano ka jingïakren halor ka jingwanrah lynti rel ha Ri-lum Khasi bad Jaiñtia kan urlong, ka long kaba donkam eh ban ïakren shuwa ïa ka jingsngew-khia (ba shisha) jong ki paidbah ha kaba ïadei bad ka jingwan rung kyrthep kaba khlem ka jingpeitngor shapoh ka Jylla.
“Ha ka jingsngew jong ngi, ka jingthaw ïa ka komiti ban ïakren bad ban pyntreikam ïa ki lad ki lynti kiba treikam pura ban khang ne peitngor ïa ka jingwan rung kyrthep kiba nabar – kum ka Inner Line Permit (ILP), ka dei ban long kaba hakhmat eh ha shuwa jong ki jingïakren halor ka jingpynïasoh lynti rel,” ong u Dr. Syngkon.
U la ong ba ka seng ka ngeit skhem ba tang ynda la don ki lad jingïada kiba biang bad ba shaniah ban tehlakam ïa ka jingwan rung kyrthep ne jingwan buhai shnong jong ki briew sha ka Jylla, yn sa lah ban pyrkhat da kaba shngaiñ halor ka jingwanrah ïa ki lynti rel, khlem da ïapeiñ pat ïa ki jingmyntoi bad ka snap jong ki trai-ri trai-muluk.
“Kano-kano ka jingïakren (kaba dang kloi eh) halor ka mat jingpynïasoh lynti rel, khlem da pynbeit shuwa ïa kine ki jingeh kiba kongsan, kan ïalam tang sha ka jingpynlut kai ïa ka por bad ki jingdon-jingem ba kordor,” u la ong.
Kum ban shu kdew hangne, ka Sorkar Jylla ka la thaw ïa ka ‘All Party Committee’, kaba kynthup ïa ki seng kiba la ithuh bad kumjuh (ki seng) kiba la dep pynrung kyrteng, ban ïakren halor ka phang ban pynïasoh da ka lynti rel sha ka Jylla.
Ka jingpynbna ba la pynmih da u Chief Secretary, Bah D.P. Wahlang ka ong ba kane ka komiti kan dei kaba la khlieh da u Myntri Rangbah ka Jylla lane da kino-kino ki Myntri kiba u Myntri Rangbah u bynshet kam.
Ha kane ka jingpynbna ka Sorkar, la bthah ba kawei-pa-kawei ka seng saiñpyrthei kan phah 2 ngut ban long ki dkhot sha kane ka komiti, bad ki tnat Sorkar ba don jingïadei bad kane ka kam ruh kin shah khot sha ka jingïalang ban pynlong da ka komiti.
Ki kam jong ka komiti ki long ban shong bishar bad wad ïa ki lad ban pynbeit, ki lad ki lynti ban wanrah ïa ka jingshna lynti rel ha Meghalaya.
Ka komiti kan bishar ruh ïa ka jinglut-jingsep lada wanrah ïa ka lynti rel hapoh ka Jylla, kan sa pan jingmut na baroh ki kynhun bad hadien kan sa aiti ïa ki jingai jingmut sha ka Sorkar Jylla.
