Shillong, Ïaïong 15
Hadien ka jingthmu jong ka Sorkar Jylla ban shimti noh ïa ki skul SSA bad ïa kiwei pat ki skul ba la pynïaid da ki kynhun niam bapher-bapher, na ka liang ka Hynñiewtrep Youths’ Council (HYC) ha ka 15 tarik u Ïaïong, 2025, ka la leit ban ïakynduh ïa u Vijay Kumar Mantri, IAS, Commissioner & Secretary ka tnat pule-puthi halor ka jingsngewkhia haba ïadei bad kane ka bynta.
Haba kren sha ki lad pathai khubor, u samla Enlang Sawian, Educa-tion Cell Secretary, u la ong ba ka jingthmu ka Sorkar ban shimti ïa ki skul SSA bad ïa ki skul niam kan wanrah shibun ki jingmyntoi ïa ki skul bad ruh ïa ki nonghikai namarba ka Sorkar Jylla kan pynkylla noh ïa kitei ki nonghikai kum ki nonghikai Sorkar bapura bad kin sa ïoh ruh da ka tulop katkum ka ‘Pay Scale’ kumba ïoh lem kiwei pat ki nonghikai Sorkar.
“U Commissioner & Secretary ka tnat Pule-Puthi u la ong ba lada kine ki Managing Committee ne ki skul jong ki nongpynïaid balang kiba kloi ban aiti sha ka Sorkar, kan wanrah jingmyntoi ruh shibun eh khamtam ïa ki khynnah pule haba ïadei bad ki jingdonkam jong ki”, ong u samla Enlang.
Shuh-shuh, u samla Enlang u la ong ba ka seng ka kyrmen skhem ba ki Managing Committee ki bym lah shuh ban pynïaid ïa ki skul ba kin long kiba la kloi ban aiti sha ka Sorkar ban pynïaid ïa ki skul jong ki.
U samla Enlang u la ong ruh na ka liang u Commissioner & Secretary u la pyntip ba ki don haduh 15 hajar tylli ki skul kiba dei ki SSA bad Government Aided School bad u la pyntip ruh ba ki don haduh 206 tylli ki skul ki bym don wat tang uwei ruh u khynnah skul katba ki nonghikai skul pat ki don ban shim ïa ka tulop bad ki don sa kumba 2,269 tylli ki skul kiba don tang khyndiat eh ki khynnah skul.
Halor kane ka bynta, na ka liang u samla Enlang u la ong ba ka jingdon pat jong ki skul ki bym don ki khynnah pule ka wanrah ka jingduhnong kaba khraw eh ïa ka Sorkar bad ïa ka tnat treikam namarba kitei ki nonghikai ki la shim tang ïa ka tulop khlem da treikam satia.
“Na ka liang ka seng, kala dawa ba ka Sorkar ka dei ban pynduhnoh ïa kitei ki skul namarba kane ka long ka jingduhnong ïa baroh khamtam ïa ki paidbah nongshong shnong bad ïa ki khynnah kiba donkam shisha ïa kata ka jingshakri lyngba ki nonghikai”, bynrap u samla Enlang.
