Nongstoiñ, Ïaïong 15
Ka jingïalehkai qualifier -1 jong ka Super Division na ka bynta ka NDSA Premier League Football Tournament 2024-25 hapdeng ka Pyndengrei SCSC pyrshah ïa ka Mawlarshong SC ka la long shisha kaba itynnad bad kaba la pynhun ïa ki ba bun ki paidbah ‘riew ïeit phutbol jong ka thaiñ Nongstoiñ, hynrei haduh ba kut noh jong ka jingïalehkai ka Mawlarshong SC ka la ïoh ban rung sha ka final ha kane ka lympung mynta ka samoi.
Ka nam tam bad ka nam jop jong ka Mawlarshong SC ka la wan hadien ba ka la lah ban pynliem noh da 4-3 kol ïa ka Pyndengrei SCSC lyngba ka tie-breaker kata hadien ba ki la ïakhaid mar shi kol haduh kaba kut jong 90 minit kaba la long ha ka Sngi Ba-ar ha madan New Nongstoin
Shuh shuh wat la ka Pyndengrei ka la mad noh ïa ka nam rem ha katei ka jingïakhun, hynrei kane ka kynhun ïalehkai ka dang ïoh biang ïa ka lad ban ïakhun pat ban ïoh rung sha ka final jong kane ka lympung ha kaba kan hap ban ïakhun biang ha ka qualifier -2 pyrshah ïa ka kynhun kaba jop na ka Eliminator.
Na ka liang ka Football Committee jong ka NDSA ka la pyntip ba ka jingïalehkai Eliminator hapdeng ka Sawlad SC pyrshah ïa ka Nongstoiñ FT kan long ha ka Sngi Balang ha ka por 2 baje nohphai sngi ha madan New Nongstoiñ.
