Nongpoh, Ïaïong 15
Palat 900 ngut ki khynnah skul na 36 tylli ki skul kiba don ha ka thaiñ Ri Bhoi District ki la wan ïashim bynta ha ka sngi sdang ïa ka District Level Inter School Athletic Meet 2025 kaba lai sngi lynter ba la pynlong ha NSCA Mini Stadium Pahamsyiem.
Ïa kane ka lympung kaba la pynlong da ka shlem treikam u District Sports Officer (DSO) Ri Bhoi ryngkat ka jingïatreilang bad ka Athletic Committee jong ka Ri Bhoi District Sports Association (RBDSA), la wan ban plie paidbah da u Bah Eric C. Dkhar, Assistant Commissioner ka Ri Bhoi District ha ka jingdon lang u Bah Bobby L Nongbet, DSO ka Ri Bhoi, Bah R.B Shadap, President ka RBDSA lem bad kiwei.
Ka jingpynlong ïa kane ka lympung ka long kum shi bynta ban ai rynsan ïa ki khynnah skul ba kin ïoh ban sei ïa ki sap ki phong kiba ki don ha ki kam ïalehkai bapher bapher nalor ka jingpule ba manla ka sngi, khnang ba kin lah ban kiew shaphrang ha ka jingim ka jong ki, nalor ba kin ïoh ïa ka jingkoit jingkhiah bad ka met kaba shait ba khlaiñ.
Lyngba kane ka lympung, kin don haduh 16 tylli ki jaid jingïalehkai bapher bapher ba kynthup naduh ki jingïakop mareh bapher bapher, ka long jump, high jump, shot put bad shibun kiwei kiwei de, ha kaba la phiah sha hynriew tylli ki kyrdan na ka bynta ki khynnah kynthei bad shynrang.
Haba ai jingkren ha kane ka sngi, u Bah Eric u la pynpaw ïa ka jingdonkam jong ka jingïashim bynta ha ki jingïalehkai khamtam na ka bynta ki khynnah skul ym tang ba kin ïoh ïa ka met kaba shait kaba khlaiñ, hynrei ba kin ïoh ruh ïa ka pyrkhat pyrdaiñ kaba khlaiñ, ka jinglong ryntih ïalade bad ka jingdon ïa ka mynsiem ïatrei lang iwei ïa iwei.
U la ai kitbok-kitrwiang ruh ïa baroh ki khynnah ïalehkai ba kin ïashim bynta shitrhem naduh ka mynsiem bad trei shitom ba kin ïoh ïa ka jingjop ba donburom bad ba kin ym klet ruh ïa ka jingpule ka jong ki, hynrei ba kin ïai minot ryngkat-ryngkat haduh ba kin poi sha ka thong kaba ki thmu bad angnud.
