Shillong, Ïaïong 16
Hadien ba ka la mih ka jingkynnoh ba ka Sorkar ba la ïalam da ka BJP ha Delhi ka la pyrshang ban khanglad ïa ki riewngeit Khristan ban mane laitluid hadien ba ki pulit ka Delhi ki la kyntait ban ai jingbit ïa ki riewngeit ka Balang Katholik kiba thmu ban pynlong ïa ka jingïaid proseshon sla tlai ha Delhi ha ka sngi rakhe ïa ka ‘Palm Sunday ‘ ne ka sngi u Trai Sla Tlai kum ka jingkynmaw burom ïa ka jingwan rung donburom u Trai Jisu Khrist ha nongbah Jerusalem ar hajar snem mynshwa ha shwa ba un shah ïap halor ka Diengphna. Na ka liang u State General Secretary ka Bharatiya Janata Party (BJP) Meghalaya State Unit, Bah Wankitbok Pohshna u la kyntait war halor kane ka jingkynnoh da kaba ong ba um lah ban ong eiei halor kane ka bynta.
Ka jingbym ailad jong ki bor Pulit ka Delhi ïa ki riewngeit ka Balang Katholik ban ïaid proseshon ha Delhi ka la mih ka jingkynthoh na kiba bun ki liang pyrshah ïa ka Sorkar ba ïalam da ka BJP ha Delhi.
Ha ka jingïakren bad ki lad pathai khubor ha ka 16 tarik u Ïaïong, 2025, u Bah Pohshna u la ong, “Ngan ym lah ban da jubab than ïa kaei kaba jia ha Delhi namar ba ka dei ka jingjia kaba pher bad ki bor synshar kiba ïapher”.
“Hato ka dei beit tang ïa ka Balang Katholik? La kylli u Bah Pohshna bad bynrap, “Na kaei kaba ngi pule (ha ki lad pathai khubor) ha ka 12 tarik, Ïaïong, shwa ka sngi u Trai sla tlai ruh wat ïa kawei ka kynhun niam ym shym la ai jingbit ban ïaid proseshon. Ngam tharai ba kan dei kaei-kaei kaba ngin hap ban sngew khohñioh.”
U Bah Pohshna u la ong ba ka jingbym ai jingbit ka lah ban long ba lehse, ki bor ba dei peit ki la pynpaw ïa ki daw jong ka jingbym shah ban ïaid proseshon.
“Ka jingbym ai jingbit da ki bor ka aiñ tang ban ïaid proseshon ym da dei eh ban kheiñ ba ka dei ka jingpynkheiñ ïa ka hok mane laitluid, hynrei ngi long kiba laitluid ban mane katba ngi kwah,” la ong u State General Secretary ka BJP. U la ong ruh ba ki bor synshar ka Delhi ki la khang tang ban ïaid proseshon sla tlai hynrei kim shym la khang pat ban pynlong ïa ki jinglehniam ha ki ïingmane ha ka Sngi U Blei kaba dei ka ‘Palm Sunday’ ne ka Sngi Sla Tlai.
U la ong ruh ba ka jingbym shah ka dei tang ka jingïaid proseshon na kawei ka ïingmane sha kawei pat hynrei kim shym la khang ïa ka jingmane Blei hapoh kane ka jaka ba don ka ïingmane.
