Shillong, Ïaïong 16
Ka hat-trick u Serhou Guirassy na ka bynta ka Borussia Dortmund kam shym la biang satia ban khanglad ïa ka Barce-lona ban rung sha ka semifinal jong ka Cham -pions League ha ka Sngi Balang.
Wat hapdeng ka jingjop ha la ïing da 3-1 kol, ka Dortmund ka la shah rem noh da 5-3 lyngba ka aggregate hadien ba ka la shah pynliem da 4-0 ha ka jingïakhun jong ka wat nyngkong jong ka quarter final.
Ha kane ka jingïakhun u Guirassy u la lah ban thep ha ka minit kaba 11, 49 bad 76, na ka bynta ban long kum u nongthep kol ba kynsai ha ka Champions League mynta ka aïom da 13 kol, hynrei na ka jingbakla u Ramy Bensebaini ban thep hi ïa ka kol ka la pynduh lah ïa katei ka kynhun ïalehkai na Germany.
Ka Barcelona, kaba la mad ïa ka jingshah rem kaba nyngkong eh ha kano-kano ka jingïakhun naduh u Nohprah, ka la pyrshang ban ïakhun tyngeh hakhmat ki paidbah nongkyrshan jong ka Dortmund. U coach Hansi Flick u bym pat ju shah rem ha ka Dortmund ha ki jingïakhun ba la dep, u la ïaroh ïa ka jingïalehkai jong ka kynhun ka liang pyrshah hynrei u la ïaroh ïa ka kynhun jong u kaba la lah ban pynthikna ban jam sha ka semi-final ha ka sien kaba nyngkong naduh u snem 2019.
Ha kawei pat ka jingïakhun ha England, ka Paris Saint-Germain ka la jam sha ka semi final lyngba ka jinglah ban tam da 5-4 ha ka aggregate, wat la ka la shah rem noh da 3-2 kol ha ka Aston Villa ha ka jingïakhun jong ka wat ba ar.
Wat la ka PSG ka la ïoh ban thep ar kol ha kaba sdang lyngba u Achraf Hakimi (11) bad u Nuno Mendes (27), hynrei ka Villa ka la lah ban pynphai kylla haduh lai kol lyngba u Youri Tielemans (34), u John McGinn (55), bad u Ezri Konsa (57). Hynrei kane ka kynhun ïalehkai Premier League kam shym la lah ban pynurlong ban jam sha ka semi final.
