Shillong, Ïaïong 16
Ka India ka la lah ban pynpaw ïa ka jingtbit ha ka ISSF World Cup kaba la long ha Lima kaba ha Peru, da kaba ka la ïoh ban khur lai tylli ki takma ha ka sngi kaba nyngkong ha kaba ka Suruchi Singh bad ka Manu Bhaker ki la khur ïa ka takma ksiar bad takma rupa ha ka jingïakob 10m Air Pistol jong ki kynthei, katba u Saurabh Chaudhary u la khur ïa ka takma rnong ha ka 10m Air Pistol jong ki shynrang.
Ka Suruchi Singh, 18 snem ka rta, ka la ïoh ban khur ïa ka takma ksiar ha ka World Cup kaba arsien lynter da kaba ïoh 243.6 point bad ban tam ïa ka Manu Bhaker da 1.3 point. Ka Bhaker ka la ïoh 242.3 na ka bynta ka takma rupa, bad ka Yao Qianxun na China ka la ïoh ban khur ïa ka takma rnong.
Dangshen, ka Suruchi kaba la khur ïa ka takma ksiar ha ka National Games, ka la rung ha ka kyrdan ba ar da ïoh kamai 582. Ka Bhaker ka la rung ha ka kyrdan kaba saw da kaba ïoh 578, katba ka Sainyam pat ka la duh rung sha ka phainal namar ka la wan ha ka kyrdan khatwei ryngkat 571.
“Ngam shym la sngewthait, bad ngam sngewthuh mano ba ïakhun bad nga, namar ka jingïakhun jong nga ka dei bad nga hi. Nga hap ban siat ïa kaba bha tam,” ong ka Suruchi, kaba la kiew na ka kyrdan kaba lai ban mihkhmat ha ka por ba ïalehkai.
Ka Bhaker, kaba pynlong ïa ka ban wanphai biang sha ka rynsan naduh ka Paris Olympic, ka la pynpaw ïa ka jingkmen halor ka jingïalehkai jong ka bad ka la ïaroh ruh ïa ka jinglah jong ka Singh.
“Ka pynsngewkmen shisha ïa nga ban ïohi ïa ki nongsiat suloi kiba dangkhynnah samla na India kiba wan shakhmat bad leh bha ha ka kyrdan jong ka pyrthei,” la ong ka Bhaker. “Ka Suruchi ka la leh bha haduh katta katta ha Buenos Aires bad mynta ha Lima bad nga kyrmen ba kane kan dang ïai bteng nangne shakhmat. Ha kajuh ka por, nga kyrmen ban ïaid beit ïaid ryntih bad ki samla.”
Ha ka jingïakhun jong ki kynthei, ka Surbhi Rao bad ka Simranpreet Kaur Brar ki la ïakhun hapoh ka Ranking Points Only (RPO), kiba ïoh mar 577 bad 576, hynrei kim shym la rung sha ka phainal.
Ka jingïoh takma rnong da u Saurabh Chaudhary ha ka Men’s 10m Air Pistol ka dei kaba nyngkong eh jong u ha ka ISSF hadien ar snem. U la ïoh 219.1 ha ka jingïakhun kaba jan bha bad u khunruid, u Varun Tomar, uba wan ha ka kyrdan kaba saw ryngkat 198.1.
Ïa ka takma ksiar la khur da u Hu Kai na China ha kaba u la ïoh 246.4, katba u Felipe Almeida Wu na Brazil u la khur ïa ka takma rupa ryngkat 241.0 poiñ.
