Nongstoiñ, Ïaïong 16
Ka Sawlad SC ka la ïoh ïa ka jingjop ha ka ‘eliminator’ jong ka Super Division na ka bynta ka NDSA Premier League Football Tournament 2024-25 ba la pynlong da ka Nongstoiñ District Sport Association (NDSA), hadien ba ka la pynliem noh ïa ka Nongstoiñ FT da 3-2 kol ha ka Sngi Balang ha madan New Nongstoiñ.
Lyngba kane ka jingjop, ka Sawlad SC ka la ïoh ban buh jaka ïalade bad ban rung sha ka qualifier-2 jong kane ka lympung mynta ka samoi ha kaba kan hap ban ïakhun pyrshah ïa ka Pyndengrei SCSC ha ka 23 tarik mynta u bnai ha ka por 2 baje nohphai sngi na ka bynta ban ïaknieh rung sha ka final.
Na ka liang ka Football Committee ka NDSA, ka la pyntip ruh ba ka jingïalehkai quarter final kaba nyngkong ha ka First Division kan sdang mynta ka Sngi Palei (17 tarik) hapdeng ka Nongpyndeng pyrshah ïa ka Ramsngiwar SC ha ka por 2 baje nohphai sngi ha madan New Nongstoiñ.
Nangta, ka jingïalehkai quarter final kaba ar kan long ha ka 19 tarik ha kaba ka Sapki West kan ïakhun pyrshah ïa ka Lad Nongsba ha ka por 12 baje mynsngi bad ka Mawkhlam ïa ka Steplanglur ha ka por 2 baje nohphai sngi.
Ka komiti ka la pyntip ruh ba ka jingïalehkai quarter final kaba khatduh jong ka First Division kan long ha ka 22 tarik hapdeng ka Nongkhlaw pyrshah ïa ka Marskuin ha ka por 2 baje nohphai sngi ha kajuh ka madan ïalehkai ha New Nongstoiñ.
